Яңа ел алдыннан Ядегәр авылында тантаналы рәвештә яңа балалар бакчасы ачылды
Яңа ел алдыннан тагын бер шатлыклы вакыйга: Кукмара районының Ядегәр авылында күптән көтелгән яңа балалар бакчасы ишекләрен ачты. Балалар, аларның әти-әниләре, учреждение коллективы шатлыгын уртаклашырга республика Дәүләт Советы Рәисе урынбасары Римма Ратникова, район башлыгы Сергей Димитриев һәм башкалар килгән иде.
Яңа бина урта мәктәп белән янәшә урнашкан, «Тургай»балалар бакчасы дип атала.
- Бүген балалар да, әти - әниләр дә түземсезлек белән көткән үзенчәлекле көн, - диде район башлыгы үз чыгышында. - Яңа ел алдыннан барлык балалар да могҗизалар көтә. Әлеге балалар бакчасы төзелеше дә, чыннан да, могҗиза булып чыкты. Безнең ышанычлы, якты киләчәгебез өчен без хәзер балалар өчен барысын да эшләргә тиеш. Алар үсәргә, үсәргә тиеш. Ә заманча белем бирү учреждениеләрен төзү моның өчен этәргеч булып тора. Балалар бакчалары буш тормасын, яшьләр авылда калсын иде.
Ә әти-әниләр ничек шат! Лилия Галимуллина сүзләренә караганда, кызы Зәринә элек иске балалар бакчасына йөргән. Кызның әнисе мәктәп каршында ярты ел гына булса да яңа бинага йөрүенә бик шат:
- Быелгы балалар бакчасын картлары белән чагыштырып булмый. Бүлмәләр иркен, якты, уңайлы, яңа җиһазлар, уенчыклар. Республика һәм район җитәкчелегенә балаларыбыз турында кайгыртулары өчен зур рәхмәт.
- Иске балалар бакчасы 1980 елда ачылган иде, әмма аның бер өлеше 1960 елда төзелгән иде, - ди балалар бакчасы мөдире Гөлнара Шәяхмәтова. - Бу балалар бакчасында без 2018 елның 1 июненә кадәр эшләдек. Бина авария хәлендә дип табылгач, аны ябалар. 2017 елның октябрендә яңа балалар бакчасы нигезенә салынды, бу елның ноябрендә төзелеш тәмамланды. Балалар бакчасы 1,5 яшьтән 3 яшькә кадәр һәм 3 яшьтән 7 яшькә кадәр ике төркемгә 25әр бала исәпләнгән. Бүгенге көндә безнең җирлектә мәктәпкәчә яшьтәге 83 бала исәпләнә. 1 яшьтән 7 яшькә кадәрге барлык балалар да балалар бакчасына урнаштырылган. Аллага шөкер, җирлектә балалар туа, «Восток» хуҗалыгы яшьләрне эш белән тәэмин итә. Балалар бакчасы буш тормас дип ышанабыз.