Туган ягым - гөлләр иле

Гөлләргә, бакча чәчәкләренә мөкиббән китмәүчеләр сирәктер ул. Тәрәз төпләрен балкытып утыручы төрле төсле яраннар, бакча тутырып үскән питуния, кашкарыйлар аерча күзне иркәли. "Чәчәк бәйрәме"ндәге матурлыкка да сокланмау мөмкин түгел иде. Көн яңгырлы булуга карамастан, мәктәпләр, бюджет оешмалары, чәчәк сөючеләр үзләренең экспозицияләрен алып килгәннәр. Ни генә юк анда! Һәркем тырышып әзерләнгән, чәчәкләрдән Россия һәм Татарстан флагын, 2013 елда узачак Универсиаданың эмблемасы - кечкенә Юнины гәүдәләндергәннәр. Ядегәр урта мәктәбе коллективының ромашка чәчәгеннән ясалган эте, Зур Сәрдек гимназиясенең чәчәккә төренгән аюы, Кукмара 1нче гимназиясе, Байлангар, Кәркәүч, Түбән Өскебаш, Сәрдекбаш, Кукмара 3нче урта мәктәпләренең күргәзмәләре аеруча игътибарга лаек иде.
Мәктәпләр арасында беренче урынга Байлангар урта мәктәбе чыкты. Икенче, өченче урыннарны исә Лельвиж һәм Туембаш мәктәпләре бүлеште. Бюджет оешмалары арасында Нырты урта мәктәбе - 1нче, Зур Сәрдек гимназиясе - 2нче, "Кошкай" социаль приюты 3нче урынны алды. Аерым кешеләр арасында беренче урында - Илсөяр Борһанова (Кукмара, Октябрь урамы), икенче урында - Кадрия Гарипова (Туембаш авылы), өченче урында - Мөнирә Фазлыева һәм Заһидә Хәлиуллиналар (Кукмара, Магистральный урамы). "Чәчәк үстерергә яратучы" номинациясендә Нурзия Евдокимова җиңү яулады.  Шәхси эшмәкәрләрдән Рафил Шакировка - беренче, Илсур Гариповка - икенче, Альбина Закировага өченче урын бирелде. Әлеге бәйрәмне оештыруда ярдәм иткән "Чиста шәһәр" оешмасына, Роза Фазлыева, Валентина Борисоваларга да рәхмәт сүзләре әйтелде.
Бәйрәмдә катнашучыларны район Башкарма комитеты җитәкчесенең социаль мәсьәләләр буенча урынбасары Светлана Җамалиева тәбрикләде, җиңүчеләргә Мактау грамоталары, истәлек бүләкләре тапшырды. Районыбызның фольклор, бию һәм вокаль коллективлары чыгышы бәйрәмне тагын да ямьләндереп җибәрде.