Алар - безнең яклаучылар

ТР Эчке эшләр бүлеге министры боерыгы нигезендә кварталга бер тапкыр уздырыла торган әлеге чарага һәркем тиешле хәзерлек белән килгән иде: тигез итеп сафка тезелгән хезмәткәрләрнең формалары ялт итеп тора, бер-бер артлы урнаштырылган автомобильләрендә дә бер тузан әсәре күренми. Бу көнне мәйдан аша узучыларның күзе нәкъ менә аларда булды, дисәк тә ялгышмабыз. Стройга тезелүчеләр таралганнан соң да: "Кукмарада бу хәтле полиция хезмәткәре эшлидер дип уйламаган идем", - диючеләр шактый иде.
-Әлеге чара җәмәгатьчелекне хокук тәртибенең нинди көчләр тәэмин итүен күрсәтүне төп максат итеп куя, - ди бүлек начальнигы, полиция полковнигы З.Гарәфиев. - Хокук сагында торучы башкалардан үзенең тышкы кыяфәте, матур итеп аралаша белүе, акыллы фикер йөртүе белән дә аерылып торырга тиеш. Без тәүлек дәвамында халыкка ярдәмгә килергә әзер. Полиция хезмәткәрләренә ышаныч булганда гына тиешле нәтиҗәләргә ирешү мөмкин. Гарнизон разводында строй гына тикшерелми, хезмәт итү чорында үзләрен бик яхшы яктан күрсәтүчеләрне дә бүләклибез. Җинаятьләрне ачуда, иминлекне тәэмин итүдә аеруча тырышып эшләүчеләр бүлектә шактый. Аларны халыкның белергә һәм күрергә, әлбәттә, хакы бар.
Полициянең участок уполномоченные И.Шәфигуллин да әнә шундыйлардан. Үзенең фидакарь хезмәте өчен гарнизон разводында күкрәк билгесе белән бүләкләнде ул.
Бүгенге көндә республика күләмендә бара торган акция һәм операцияләр белән танышкач, җинаятьләрне эзләү бүлеге начальнигы И.Әхәтов эзләнүдә булган затлар, урланган автомобильләр хакында сөйләде. Полиция начальнигының җәмәгатьчелек хокук тәртибен саклау буенча урынбасары вазыйфаларын башкаручы Л.Закировның комплекслы рейдка булган өндәмәләрен алган һәр хезмәткәр разводтан соң үз юнәлеше буенча эш урыннарына юл тотты.