Мәчет кабат яңартылды

Мөхтәрәм кунакларны көткәндә Янсыбыдан 60 ел элек бәхет эзләп чыгып киткән, хәзер  Красная Поляна шәһәре имам-хатыйбы Габделәхәт хәзрәт авылдашларының сөенечен уртаклашып, гыйбрәтле вәгазь сөйләде. Тантананы Коръән аятен укып башлаган Кукмара үзәк мәчете имам-хатыйбы Әхтәм хәзрәт җыелган халыкны мәчеткә шушы көндә килгән шикелле бердәм йөрергә чакырды. Район Советы рәисенең беренче урынбасары Равия Абдулла кызы быел гына да районда дүрт мәчет, бер мәдрәсә төзелеп сафка басуын горурланып бәян итте.

Татарстан Диния нәзарәте баш казые Җәлил хәзрәтнең гадәтенчә гыйбрәтле мисаллар китереп сөйләгән вәгазе һәркем тарафыннан йотлыгып тыңланды. "Бар юньсез сыйфатлардан арыну калебне - күңелне чистартудан башлана", - диде ул. Дога кылганда, намаз укыганда кешегә җан тынычлыгы иңә. Балтач дин әһелләре әнә нинди фикергә килгәннәр: ун яше тулган һәр бала намаз укый белергә тиеш! Сүз,  әлбәттә, мәҗбүриләү турында бармый. Тантанада чыгыш ясаган район мөхтәсибе Зиннур хәзрәт, мәчет ачылуга багышлап язган шигырен укыган Суфия ханым, авыл имамы Фәргать хәзрәт, китап авторы Муллахмәт Абдуллин, җирлек башлыгы Марат Галиев бер теләктә - мәчет бинасы буш тормасын!
Изге эшен дәвам итеп, Равил Рашит улы авыл өлкәннәренә күчтәнәчләр өләште, намаздан соң сыйлы табынга дәште.