Көрәшчеләр сабан туе

Тышта көйдереп ала торган гыйнвар суыгы. "Ялкын" спорткомплексында гайрәтле ирләр, егәрле яшь-җилкенчәк, елдам бала-чага гөр килә. Әнә, кояштай балкып, район сабантуйларының 14 тапкыр баш батыры калган Нурсил Галиев килә, үзара бәйрәм белән котлашып, яшьлекләрендә мәйдан тоткан олпат ир-батырлар Рәмис Фәхретдинов, Мәгъсүм Нуриев, Таһир Әхкәмов, Нурислам Галимбәков, Хәким Насыйров, Наил Газизуллин, Расим Шаһиев, Миннерахман Ваккасов, Факил Вәлиуллин, Ринат Галимуллин, Илдар Хәбибуллиннар ашыга. Спорт белән гомер буе дус булган Артур Зәкиев, Рамил һәм Фәнил Хәсәновлар, Рафис Нәкыйпов та - бәйрәмнең хөрмәтле кунаклары. 

Район Башлыгы призына икенче ел рәттән үткәрелә торган милли көрәш турниры һич арттырусыз бәйрәм булды. Хикмәт аны район мәдәният йорты үзешчән артистларының тантаналы төстә зәвыклы программа белән башлап китүләрендә генә түгел. Артур Зәкиев әйтмешли, сабантуйда да моның кадәр затлы көрәшчеләр барысы бергә җыйнала алмый. Ә бүген - кемнәр генә юк! Йөзләгән көрәшче алты сәгать буена көрәшеп, гаҗәеп тамаша ясадылар.

Бәйгене район сәнгать осталары Роза Тимеркина, Резеда Кузьмина һәм Рәшит Бакировлар әзерләгән бию ансамбльләре башлап җибәрде. сабантуй күренешләрен, егетләрнең ут чыгарып, кызларның күңелләргә очкын чәчеп биюләрен, вокаль ансамбльләрнең җырларын тамашачылар тын да алмый сокланып карадылар, ашыга-ашыга видеотасмаларга, фоторәсемгә төшерделәр. Бәйгене ачу тантанасы спорт темпында, ялыктырмыйча бер тын белән барды.

Татарстанның атказанган тренеры Нуретдин Зыятдинов тезгән парадны кабул итеп, район Башлыгы Рауил Рәхмәтуллин үткән 2012 елда районыбыз спортчыларының уңышларын санап, Россия, Татарстан бәйгеләрендә Кукмара данын уңышлы яклауларын билгеләп үтте. Чыннан да, ут уйнатып эшли дә, ярышларда катнашып җиңә дә, күңелле итеп ял да итә белә, иманлы булып динен дә тота безнең халык. Рауил Шәйдәүләт улы 2012 елда спортта ирешкән уңышлары белән котлап, Олыяз көрәшчеләре остазы Илсур Нәҗмиевка һәм Кәркәүч көрәшчеләре остазы һәм милли көрәш буенча республика чемпионы Илгиз Әхмәтгалиевка район Башлыгының Рәхмәт хатларын тапшырды.

Көрәш тугыз үлчәү категориясендә бик кискен барды. Ике келәмдә барган бәйгене тамашачылар кичкә кадәр аерыла алмый йотлыгып карады. 100 килограммлы үлчәү категориясендә Зөлфәт Гарифуллин белән Ринат Дәүләтшин, 90 килограммлы үлчәүдә Фәһим Кадыйров белән Рөстәм Газизуллиннар вакыт чыккач та бер балл алу өчен әле күпме алыштылар...