Кукмара Мәдәният йортында «Татар кызы» республика конкурсының зона этабы узды. Бәйге татар милли мәдәниятен, гореф-гадәтләрен пропагандалау һәм үстерү максатында үткәрелә.
Конкурста Биектау, Лаеш, Балтач, Саба, Теләче, Кукмара районнары кызлары көч сынашты, үзләренең осталыкларын, уңган-булганлыкларын күрсәтте.
Районыбызны Мәчкәрә авылыннан Таңсылу Рәхимова тәкъдим итте. Таңсылуга — 17 яшь. Ул 11нче сыйныфта укый.
Кызлар үзләре белән таныштырдылар, иҗади номер, аш-суга осталыкларын күрсәттеләр һәм интеллектуаль уенда сорауларга җавап бирделәр.
Лаеш районыннан Ризәлә Сибгатова, Балтачтан Сиринә Закирова, Кукмарадан Таңсылу Рәхимовалар ярымфиналга чыкты.