«Уңыш» хуҗалыгында язгы чәчүгә әзерлек кыза
Баш инженер Рамил Сабитов сүзләренә караганда, хуҗалыкта ремонт эшләре ноябрьдә башланган. Башта тырмалар һәм культиваторлар тәртипкә китерелгән, аннан соң авыл хуҗалыгы машиналары, ә соңрак ашлама кертү һәм азык әзерләү техникасы белән шөгыльләнгәннәр. Бүгенге көндә хуҗалыкта 23 трактор һәм 8 КамАЗ бар. Запас частьлар белән җитди проблемалар юк — кирәкле әйберләр вакытында килеп тора. Кирәк булганда, куәтле К-700 тракторларын зур ремонтлау һәм КамАЗ машиналарына капиталь ремонт Яр Чаллыдагы махсус үзәкләрдә башкарыла.
Турыдан-туры җитештерүчеләрдән сатып алулар экономияләргә мөмкинлек бирә, ләкин белгечләр сак булырга кирәклеген ассызыклый: түбән бәя һәрвакыт сыйфатны гарантияләми. Хуҗалыкның планнарында — машина-трактор паркын сыек ашлама кертү җайланмасы булган культиватор, төягеч трактор һәм кукуруз чәчкече белән тулыландыру.
Кадрлар мәсьәләсе дә хәл ителгән: механизаторлар җитәрлек, Кукмара аграр көллиятеннән ике яшь белгеч практикага килгән. Тәҗрибәле механизаторларның берсе Александр Котельников «Уңыш»та 2019 елдан эшли. «Хәзер ремонт белән шөгыльләнәбез, запас частьлар белән тәэмин ителгәнбез. Эшләргә теләүче өчен мөмкинлекләр зур. Ә миңа техника белән кайнашу ошый, шуңа күрә бу һөнәрне сайладым», — дип уртаклаша ул.