Әдәбият һәм сәнгать әһелләре белән очрашу

Кукмара №4 мәктәбендә Мәдәният елын әдәбият һәм сәнгать әһелләре белән берлектә ачып җибәрделәр. 5 нче февраль көнне, мәктәпкә мөхтәрәм кунаклар килделәр. Алар Казан университеты доценты, әдәбият белгече, педагогика фәннәре докторы Әлфәт Закирҗанов; шагыйрь, прозаик, драматург, публицист, тәнкыйтьче, Ф.Хөсни, М.Җәлил, Г.Тукай исемендәге премияләр лауреаты, Татарстанның атказанган сәнгать эшлеклесе, Татарстан Язучылар берлеге әгъзасы Ркаил Зәйдулла; атказанган сәнгать эшлеклесе, язучы, сүз остасы, режиссер, композитор, популяр җырлар авторы, “Чаян” журналы редакторы, “Казан утлары” журналының пропаганда бүлеге мөхәррире Алмаз Хәмзин иделәр.
Кичә бик күңелле узды: сәхнәдә татар моңы, татар җыры, татар шигыре яңгырап торды. Ә.Закирҗанов үз хезмәте турында сөйләп, чыгарылыш сыйныф укучыларын Казан дәүләт университетына укырга керергә чакырды. Р.Зәйдулла ялкынлы шигырьләрен укып, үз иҗатына киң колачлы кызыксыну уятты. Ә А.Хәмзин бөтен залны авызына каратып торды, үзе иҗат иткән җырларын башкарды, укучылар да аңа кушылып җырладылар. актив укучыларга истәлеккә китапларын бүләк иттеләр. Укучылар да, кунаклар да бик кәнагәть калдылар.