Кукмарада "Игътибар - балалар" акциясе бара

Республикада “Игътибар – балалар!” кисәтү акциясе старт алды. Укучыларның язгы каникуллары чорына туры килүче әлеге акциянең төп максаты – балалар катнашында килеп чыккан юл фаҗигаләренең санын киметү. Акция барышында ЮХИДИ инспекторлары юл йөрү кагыйдәләрен бозучы балаларны аеруча нык контрольгә алачак. Юлны тиешсез урыннан, светофорның кызыл утына чыккан укучыларга махсус карточкалар тутырылып мәктәпләргә җибәреләчәк. Шулай ук тиешле тизлекне сакламаучы, балаларын махсус автоурындыклар белән җиһазландырмаган килеш юлга чыкканнарга да таләпләр катгый булачак.

Агымдагы елның ике аенда республикада балалар белән бәйле 55 һәлакәт булды, аларда 5 баланың гомере өзелде, 66сы төрле тән җәрәхәтләре алды. Бәхетсезлек очрагына дучар булып, гомерләре өзелгән балаларның барысы да пассажирлар, дүртесе махсус урындык белән җиһазландырмаган автомобильдә хәрәкәт иткән.