Кукмарада чәчү бетте, әмма эшлисе эш бар әле

Районыбыз хуҗалыкларында һәм агрофирмаларында бөртекле сабан культураларын чәчү тәмамланды, бу эш 21905 гектарда башкарылды. Хәзерге вакытта соңгы гектарларда кукуруз һәм азык культуралары чәчелә. “Урал”, Вахитов исемендәге, “Восток” хуҗалыкларында бәрәңге утырту бара. Чәчүлекләрне тәрбияләп үстерү дә – бүген игенчелектә көн кадагында торган мәсьәләләрнең берсе. Көннәрнең җылы торуы корткыч бөҗәкләрнең үрчүенә, чүп үләннәренең күпләп шытып чыгуына китерә. Шуңа “яшел янгын”га каршы кичекмәстән көрәш алып барырга кирәк. Бүгенге көндә район буенча 10 мең гектарга якын басулар чүп үләннәренә корткычларга һәм авыруларга каршы эшкәртелгән.