Кукмарада "Игътибар - балалар" акциясе төгәлләнде

2014 елның 20 июне, җомга
Балигъ булмаганнар арасында юл-транспорт фаҗигаләрен кисәтү максатыннан уздырылучы “Игътибар – балалар!” акциясе төгәлләнде. Акция кысаларында полициянең ЮХИДИ, балигъ булмаганнар белән эшләү бүлекчәсе хезмәткәрләре, рейдларга чыгып, юл йөрү кагыйдәләрен үтәмәүче балаларны ачыкладылар, ата-аналар җыелышларында катнаштылар, балалар белән юлларда, транспортта үз-үзеңне тотуга юнәлдерелгән конкурс-викториналар уздырдылар. Автомобилен махсус балалар утыргычы белән җиһазландырмаган – 26, иминлек каешы куймаган – 13, җәяүлеләргә юл бирмәгән 22 машина йөртүче штрафка тартылды. Юл йөрү кагыйдәләрен санга сукмаучы 13 балага - ЮХИДИ хезмәткәрләре тарафыннан кисәтү карточкасы төзелде. Шулай ук юлда тәртип бозган 10 велисипедчы тоткарланды. Бер мотоциклчы баланың әти-әнисе административ җаваплылыкка тартылды. Бу хакта район ЮХИДИ начальнигы Фирдүс Фәхретдинов хәбәр итте.

Алда – кояшлы, матур җәй. Балаларның каникуллары хәвеф-хәтәрсез узсын, әти-әниләренә кайгы-хәсрәт китермәсеннәр иде. Тиешле тизлекне саклау, кечкенә пассажирларга карата игътибарлылыкны тагын да арттыру – һәркемнең бурычы булырга тиеш.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International