Фестивальдән ЮНЕСКО дипломы белән!

Туапсе шәһәре янындагы “Комсомольск” лагеренда “Орленок” Бөтенроссия Балалар үзәге өченче ел рәттән, төрле милләт балалары арасында Мәдәни Фестиваль уздыра. Быел Татарстаннан бу саллы Фестивальдә 50гә якын бала катнашты. Оештырылганнан бирле бу чараларда Рәсәйнең 37 регионыннан 800 кыз һәм малай үзләренең сәләтләрен күрсәтеп, тәҗрибә уртаклашканнар инде. Фестиваль программасында иҗади очрашулар, мастер-класслар, милли бәйрәмнәр, күпсанлы экскурсияләр, үзенчәлекле концерт программалары, яңа милли проектлар тәкъдим итүләр булды. Кара диңгез буенда, “бочка” дип аталган кызыклы махсус тору урыннарына урнашканнан соң төгәл режим белән узган 21 көннең һәр көнендә төрле темаларга интеллектуаль һәм спорт бәйгеләре, бик күп иҗади конкурслар уздырылды. “График шулкадәр тыгыз, хаттә кул сузымында гына булган Кара диңгездә коенып, туйганчы комда кызынып ятарлык та булмады”,- диләр кызлар. Безнең Зур Сәрдек мәдәният йортының, Альмира Данил кызы Шәймәрданова җитәкчелегендәге “Чәчкә” халык бию ансамбле әлеге фестивальгә махсус программа белән барды һәм зур уңышларга ирешеп, әллә никадәр Мактау кәгазьләренә, бүләкләргә күмелеп кайттылар. Кызлар башкарган фольклор композицияләр, милли биюләр, алар уздырган Сабан туе бәйрәме һәркемнең күңеленә хуш килде. Спорт ярышларында да алдынгылыкны бирмәделәр, һәр төрдә катнашып призлы урыннар яуладылар. Фестивальне оештыру комитеты әгъзасы, Республика Балалар иҗаты үзәге директоры урынбасары Екатерина Владимировна Чекмарева бу җәһәттән, сезнең кызларыгыз аркасында мин Татарстан белән горурланам, дип, рәхмәт сүзләре белән шалтыратты. Исламия Горохова, Гүзәл Кәримуллина, Камилә Мостафина, Айзилә Шәймәрданова, Гүзәл Бобокулова, Гүзәл Әхмәтшина, Зилә Галимҗановаларның уртак тырышлыгы белән районыбызга яңа иҗади җиңүләр кайтты.
Бу сезонда катнашкан балалар коллективлары республика һәм бөтенрәсәй фестиваль -конкурсларының Лауреатлары исемнәрен йөртүчеләр иде. Кабардин-Балкар, Саха Якутия, Алтай, Ингушетия, Удмуртия, Калмык республикаларыннан, Чиләбе, Пермь, Самара, Ленинград, Мәскәү, Түбән Новгород өлкәләреннән иң көчле балалар коллективлары Фестивальдә үз милләтләренең фольклор хәзинәсен тәкъдим иттеләр, этнографик һәм хореографик чыгышлар күрсәттеләр. Шулар арасында бердәнбер авыл бию коллективы, бик күп еллардан бирле төрле шәһәрләрнең Сабан туйларында тамашачы мәхәббәтен яулаган “Чәчкә” халык бию ансамбленең дә булуы мәдәният йортыбызның да, Зур Сәрдек гимназиясенең дә, районыбызның да зур горурлыгы. Уртак шатлыгыбызның иң зурысы - Фестивальдә ансамбльгә ЮНЕСКО дипломы бирелде! Бу иҗади уңышлар – ансамбльнең җитәкчесе Альмира Шәймәрданованың күпьеллык тырыш хезмәте нәтиҗәсе ул. Биючеләребезне ерак юлларга озатып калучы әти-әниләребезгә дә зур рәхмәтләребезне ирештерәсебез килә. Алар ярдәме белән милли биюләрнең реквизитлары ясала, бию костюмнары тегелә. Бездәгедәй әти-әниләр тагын башка җирләрдә бар микән?! Фестивальгә баруның финанс чыгымнарын да тулысы белән әти-әниләр күтәрделәр. Бәйрәмнәрдә сәхнәбездә чыгыш ясаучы төрле яшьтәге алтмышлап баланы бию серләренә өйрәтеп, милли сәнгатебезгә мәхәббәт тәрбияләүдә арымый эшләүче хезмәттәшебез , “Мәдәнияттәге казанышлары өчен” медале иясе Альмирабызга һәм ансамбльгә киләчәктә яңа уңышлар телибез. Бөтенрәсәй Балалар Фестивалендә катнашу –Мәдәният елының иң зур истәлеге ул!

Рәмзия Хөсәенова, Зур Сәрдек мәдәният йорты сәнгать җитәкчесе