Кукмарада 40 фатирлы өр-яңа йортның ачкычлары ияләренә тапшырылды

Бүген бистәбездә истәлекле вакыйга булды. Поселокның Гафиятуллин урамында социаль ипотека программасы нигезендә төзелгән 40 фатирлы йорт ияләренә тапшырылды. Әлеге йорттан фатирлар ветераннарга һәм аларның тол калган хатыннарына, бюджет системасында һәм районның оешма-предприятиеләрендә хезмәт куючыларга, тузган торакны бетерү программасы буенча исәптә торучыларга бирелде.

Яңа йорт тирәсендә чын мәгънәсендә бәйрәм иде. Көн салкынча һәм җилле булуга карамастан, халык та бик күп. Шулай булмыйни?! Фатир ачкычлары көн саен тапшырылмый бит, дусларның, туганнарның, якыннарның шатлыкларын уртаклашып калырга кирәк.

Йорт ачылу тантанасында район Башкарма комитеты җитәкчесе урынбасары Азат Гарифуллин һәм башкалар катнашты.

-Әлеге йорттан фатирлы булуыбызга сөенеп бетә алмыйбыз, - диләр Өлгедән килгән Альбина һәм Илгиз Салиховлар. – Биредә улыбыз Рифат, киленебез Ләйсән һәм аларның ике балалары – Әмир белән Элина яшәчәк. Мондый төр республика программаларының булуы бик яхшы. Республика, район җитәкчелегенә рәхмәтебез чиксез.