ЯҢАЛЫКЛАР

Республикабыз Президенты Рөстәм Миңнеханов кушуы буенча “Йолдызлык- 2014” телевизион җыр-бию фестивале җиңүчеләре – барлыгы 170тән артык бала Кырым республикасында чыгышлар ясыйлар. Алар арасында Кукмара балалар сәнгать мәктәбенең “Выше радуги” вокаль-хореографик ансамбле дә (җитәкчесе Республиканың атказанган мәдәният хезмәткәре Венера Гыйлаҗева) бар.

Кукмара автомәктәбендә үткән яртыеллыкта 336 райондашыбыз укыган. Шуларның 145е - җиңел машина, 18е – йөк машинасын, 71е прицеплы машина йөртергә өйрәнгән. 46 егет шофер һөнәрен хәрби комиссариат аша үзләштергән. Автосыйныфларда 56 укучыга белем бирелгән.

8 июльдән 13 июльгә кадәр Воронеж өлкәсенең Нововоронеж шәһәрендә X Бөтенроссия җәйге авыл спорт уеннарының финал ярышларын узды. Анда Россиянең 66 төбәгеннән 2500гә якын спортчы катнашты. Алар арасында Татарстанның җыелма командасы составында чыгыш ясаган кукмаралылар да бар иде.

Тукай” агрофирмасында урып-җыюга хәзерлек уңаеннан комбайннар парады үткәрелде һәм терлекчелек тармагының 6 айлык нәтиҗәләренә йомгак ясалды.

Быел Лубян урман-техник көллиятендә көндезге бүлекне тәмамлаган – 72, читтән торып укыган 19 кешегә урта һөнәри белем турында дипломнар тапшырылды.
Кукмара районында урнашкан көллияттә «Урман һәм урман-парк хуҗалыгы», «Бакча-парк һәм ландшафт төзелеше», «Икътисад һәм бухгалтерлык исәбе» белгечлекләре буенча кадрлар әзерлиләр.

Һөнәри бәйрәмнәре уңаеннан Зур Сәрдек почта бүлеге җитәкчесе Рәбига Сәлихова Россия Федерациясе Элемтә һәм массакүләм коммуникацияләр Министрлыгының Мактау грамотасы белән, Югары Чура почта бүлеге җитәкчесе Галина Филиппова “Россия почта”сы федераль дәүләт унитар предприятиесенең Мактау грамотасы белән бүләкләнделәр.

Кукмара бистәсендә яшәүче иң матур, иң бәхетле парларның берсе – Валентина һәм Валентин Ивановлар өчен 12 июль көне аеруча истәлекле. Керәшен халкының милли бәйрәме – Питрауда тормыш корып җибәрәләр һәм шул көннән икесе бер җан булып, иңнәрен-иңгә куеп бәхет атында чабалар алар.

“Мәктәпләргә капиталь ремонт” республика программасы кысаларында Поч.Сутер урта мәктәбендә ремонт эшләре дәвам итә. Барлыгы 108 тәрәзә, 78 ишек яңага алыштырылган, 1800 квадрат метрлы түбәне калай белән ябу бара. Алда эчке буяу-шомарту эшләрен башкару бурычы тора.

Район үзәк китапханәсе хезмәткәре Лилия Гарипова “Тылсым” социаль яклау үзәгендә булып, “Сәламәт яшәү рәвеше – озын гомерлелеккә юл” дигән мәгълүмати сәгать үткәрде.

Иске Каенсар авылы урамын төзекләндерү бара: юлга вак таш җәелә. Бу эш Кукмара юл идарәсе көче белән башкарыла, дип хәбәр итте Важашур авыл җирлеге сәркатибе Анжела Кузнецова.