ЯҢАЛЫКЛАР

Районыбыз хуҗалыкларында терлек азыгы хәзерләү бара. Авыл хуҗалыгы һәм азык-төлек идарәсеннән алынган мәгълүматларга караганда, район буенча ике мең тоннадан артык печән хәзерләнгән, 8 мең 500 тонна сенаж салынган. Яфраказык туплау өчен дә хәзер иң кулай вакыт. Бу эшкә оешма-предприятие коллективлары да җәлеп ителде. Уртак тырышлык белән 50 мең пар миллек әзерләнде, 5 тонна дару үләннәре җыелды. Узган атнада яуган яңгырлар печән әзерләүне берникадәр тоткарлады, шуңа бу атнада күпъеллык үләннәрнең беренче катын җыеп алу өчен эш темпын арттыру кирәк.

Казан шәһәренең Мирный бистәсендә халкыбызның милли бәйрәме Сабантуй узды. Әлеге чарада Кукмара районы халкыбызның көнкүреше, гореф-гадәтләре, һөнәр-кәсепләре, мәдәниятләрен чагылдырган ишегалды тәкъдим итте. Татарстан Президенты Рөстәм Миңнеханов һәм башка кунакларны район Башлыгы Рауил Рәхмәтуллин каршылады. Кунаклар күргәзмәләр белән таныштылар, үзләренә кирәкле мәгълүмат алдылар, бик канәгать булуларын белдерделәр.

Балыклы авылы китапханәсендә язучы Абдулла Алишның иҗатына багышланган кичә үтте. Анда укучылар язучының әкиятләрен сәхнәләштерделәр, шигырьләрен сөйләделәр, китап күргәзмәсе белән таныштылар. Татар теле укытучысы Алинә Гафиева Алишның тормыш юлы буенча призентация күрсәтте. Бәйрәмдә район китапханә бүлеге методистлары, авыл китапханәчеләре дә катнашты. Бу хакта китапханәче Сәлимә Каюмова хәбәр итте.

Районыбызның Җиңү паркында хәтер һәм кайгы көненә багышланган митинг узды. Анда сугыш һәм хезмәт ветераннары, мәктәп укучылары катнашты. Район хәрби комиссары Равил Гафиев, район башкарма комитеты җитәкчесе урынбасары Розалия Галиевалар Бөек Ватан сугышының илебез өчен гаять зур сынау булуы турында сөйләделәр, тыныч тормышның кадерен белергә чакырдылар. Митингта катнашучылар исеменнән сугышта һәлак булганнар истәлегенә куелган һәйкәл янына чәчәкләр салынды.

Районыбызның социаль-тернәкләндерү бүлекчәсен хаклы рәвештә кечкенә шифаханә дип атыйлар һәм аның пенсионерлар арасында дәрәҗәсе бик югары. Биредә Раузалия Яппарова җитәкчелегендә дус, бердәм коллектив эшли. Аларның максатлары инвалидларга һәм өлкәннәргә ярдәм итүгә юнәлдерелгән. Узган өч ел эчендә ике меңнән артык кеше социаль тернәкләнү узып, сәламәтлекләрен ныгыттылар. 2009-2013 еллардан кешеләргә ярдәм итүдә яңа ысуллар тормышка ашырыла башлады. Хезмәт белән дәвалауга күп урын бирелә. Шулай ук биредә инвалидлар өчен техник һәм башка тернәкләндерү чаралары кулланыла. Бүгенге көндә бу мөмкинлектән кырыктан  артык кеше файдалана. “Аргамак” инвалидлар командасы республика буенча бик күп призлы урыннар яулый. “Сәламәтлек” һәм “Остеохондроз профилактикасы” командаларында һәрдаим 27 пенсионер шөгыльләнә. “Ветеран” клубы составында да - районның һәм республиканың мөхтәрәм кешеләре.

27 июньдә халыкка бушлай юридик ярдәм күрсәтү проекты кысаларында республикабызның Кукмара нотариаль округы нотариуслары, район прокуроры һәм адвокатлары халыкка бушлай юридик ярдәм күрсәтәчәкләр. Түбәндәге адрес буенча мөрәҗәгать итәргә: Кукмара поселогы, Ленин урамы, 15, район башкарма комитеты бинасы, 1нче кат, “Бердәм Россия” партиясенең җәмәгать кабул итү бүлмәсе.

Кукмара өченче урта мәктәбе укучысы Булат Гыйниятуллин Татарстан Республикасы Фәннәр академиясендә узган “Татарстан Эрудиты - 2014” конкурсында лауреат исеменә лаек булды.

Кукмара элеваторында ашлык складының түбәсен яңарту, яңа калай белән каплауга керешкәннәр. Бу эш элеваторның янгын сакчылыгы хезмәткәрләре Илсур Зәйнәгиев, Мидхәт Зиннәтуллин, Альберт Шаһабиев тарафыннан аларның ял көннәрендә, эш сәгатьләреннән соң башкарыла. Эш барышында хезмәт куркынычсызлыгы таләпләре саклана.

Җиңү Паркы каршындагы мәйданда районыбызның чыгарылыш сыйныф укучылары өчен зур бәйрәм үткәрелде.

21 июньдә, 10 сәгатьтә үзәк стадионда Ринат Мөхәммәтшин истәлегенә багышланып уздырылачак футбол турниры буенча жирәбә үткәреләчәк. Командалар вәкилләрен жирәбә салуда катнашырга чакырабыз.