Кукмараның югары сыйныф укучылары авыл хуҗалыгы юнәлешендәге уку йортлары вәкилләре белән очрашты

Районыбыз мәктәпләренең 9-11 сыйныф укучылары, Кукмара аграр көллияте студентлары Татарстан авыл хуҗалыгы һәм азык-төлек министрлыгы вәкилләре, Казан дәүләт аграр университеты, ветеринария медицинасы академиясе галимнәре белән очраштылар. Пчеловодтагы гаилә фермасында, Вахитов исемендәге хуҗалыкның машина-трактор паркында, мега-фермада булып, алардагы эшчәнлек белән танышканнан соң, пленар өлеш Вахит авылы мәдәният йортында дәвам итте. Анда район җитәкчесе Сергей Димитриев һәм кунакларның чыгышлары тыңланды.

Авыл хуҗалыгы өлкәсендә яшь кадрларга, аеруча югары белемле агрономнар, зоотехник, мал табиблары, механизаторларга сорау һәрчак зур. Заманча, компьютер белән җиһазландырылган куәтле техникаларны иярләү өчен нәкъ менә яңа мәгълүмати технологияләрне тирәнтен белгән, теоретик һәм практик белемнәргә ия булган яшь белгечләр кирәк.

Югары уку йортларын тәмамлап, хуҗалыкларга эшкә кайткан яшь белгечләргә хөкүмәттән 100 мең сум, ә техникум белеме булганнарга 50 мең сум башлангыч түләү (подъемный) каралган. Шулай ук бер ел дәвамында югары белемле белгечләрнең төп хезмәт хакына ай саен минималь оклад күләмендә өстәмә түләнә, грантлар алу, шулай ук торакка мохтаҗ булганнарга авылны социаль үстерү программасы буенча торак төзергә субсидияләр, ташламалы кредитлар алу мөмкинлеге дә бирелә. Тагын шунысын да билгеләп үтәргә кирәк: әгәр авыл хуҗалыгы предприятиесенә белгеч кирәк икән, чыгарылыш укучысы белән алдан килешү төзи дә, ул югары уку йортында белем алганда ай саен аңа 10 мең сум стипендия түләп тора. Әлеге стипендиянең биш мең сумын хөкүмәт хуҗалыкка кире кайтара. Диплом алганнан соң, яшь белгеч килешү төзелгән хуҗалыкка эшкә кайта һәм анда өч ел, ә инде хуҗалык аны йортлы да итсә, иң кимендә биш ел эшләргә тиеш була.