Ядегәр җирлегендә Бөек Җиңүнең 70 еллыгына багышланган тантаналы чара үтте

7 май көнне Ядегәр авыл җирлегендә зур бәйрәм Җиңүнең 70 еллыгы билгеләп үтелде. Бәйрәмебез Г.Г.Гарифуллин исемендәге Ядегәр урта мәктәбе укучыларының билгесез солдатлар күмелгән каберлеккә венок салудан башланды. Аннары җирлегебездә яшәп ятучы тыл ветераннары, мәктәп укучылары, укытучылары, килгән кунаклар катнашында митинг узды. Ул сугышта һәлак булып калган солдатларыбыз истәлегенә куелган һәйкәл янында узды. Тыл ветераннарыбызга зур теләкләр, рәхмәт сүзләре әйтелде. Ветераннар да укычыларга үзләренең теләкләрен җиткерделәр, сугышның нинди ачы, мәрхәмәтсез булуын сөйләделәр. Илебездә мондый сугышларның бүтән булмавын теләделәр. Митинг тәмамлангач, ветераннарыбыз белән берлектә һәйкәл янындагы яшеллеккә алма агачлары утыртылды.
Бәйрәм Ядегәр авыл клубында чәй өстәле артында дәвам итте. Анда авылыбызның үзешчәннәре, мәдәният хезмәткәрләре ветераннарыбызга үзләренең матур-матур җырларын бүләк иттеләр. Ветеранарыбыз соравы буенча, сугыш чоры җырлары да җырланды. Олылар бер-берсе белән рәхәтләнеп аралашып, хәтирәләрен яңартып, зур рәхмәтләр әйтеп таралыштылар.