ЯҢАЛЫКЛАР

Сазтамак авылында гомер кичерүче Хөрәмшина Минзадә Ильяс кызына 90 яшь тулды. Юбилярны район социаль яклау бүлеге җитәкчесе Светлана Җамалиева тәбрикләде, Россия Президентының котлау откртыкасын, район башлыгының Рәхмәт хатын, истәлек бүләге тапшырды. Байлангар җирлеге башлыгы Илфат Минегалиев та юбилярга котлау сүзләрен ирештерде.

Кукмарада эш визиты белән ТР Транспорт һәм юл хуҗалыгы министры Ленар Сафин һәм “Главтатдортранс” идарәсе директоры Эдуард Даниловлар булып китте. Башкала кунаклары район территориясендәге юлларның торышы белән таныштылар. Аларны район башлыгы Сергей Димитриев озата йөрде.

Район башлыгы Сергей Димитриев, район Советы һәм Башкарма комитет хезмәткәрләре, җирлек башлыклары, сәркатипләр, мәктәп директорлары ГТО нормалары тапшырды. Хатын-кызлар - ике, ир-егетләр өч чакрымга йөгерде.

Район башлыгы Сергей Димитриев социаль-икътисадый һәм сәяси мәсьәләләр буенча киңәйтелгән утырыш уздырды. Анда авыл җирлекләре башлыклары, оешма-предприятие җитәкчеләре, мәктәп директорлары, идарә, район Советы, Башкарма комитетның бүлек начальниклары катнашты. Киңәшмәдә район эчке эшләр бүлеге начальнигы Рамил Нургалиев, Кукмара районы буенча янгын күзәтчелеге начальнигы Нурфат Яппаров, район башлыгы урынбасары Равия Каримуллина һәм башкалар чыгыш ясады, дип хәбәр итә Кукмара муниципаль районы сайты.

     Кукмара үзәк китапханә китапханәчеләре Пахомова Валентина Геннадиевна, Саттарова Лилия Раисовна Малмың үзәк китапханәсендә уздырылган «Я здесь живу, и край мне этот дорог» исемле регионара семинарда катнаштылар.

Читаттагы "Урам бәйрәме" бүген Ворошилов урамында 20 йорт ишегалдында булды. Бәйрәмдә район башлыгы Сергей Димитриев һәм башка җитәкчеләр катнашып, халыкны борчыган сорауларга җавап бирделәр. Бу йорт алдында балаларга уен мәйданчыгы узган ел ясалган иде, быел волейбол площадкасы яшь спортчылар карамагына тапшырылды. Бәйрәм, әлбәттә, җырсыз-моңсыз булмый. Урам халкы, килгән кунаклар район мәдәният йорты хезмәткәрләре тарафыннан әзерләнгән концерт карады, табындагы сый-хөрмәттән авыз иттеләр.