ЯҢАЛЫКЛАР

Россия Федерациясе Хөкүмәте карары нигезендә, башкарма власть һәм җирле үзидарә органнары белән берлектә 4 октябрьдә гражданнар оборонасы буенча Бөтенроссия күнегүләре үткәрелә. 

Районыбызда агач утыртуның көзге сезоны да башланып китте. Күп кенә хуҗалыклар ян бакчаларына җимеш агачлары утырткан. Кукмара урман хуҗалыгы тарафыннан исә ел башыннан чокырлы урыннарга, тау битләренә, елга буйларына 285 гектар, урман фондында 38 гектар агач утыртылган. Хәзерге вакытта Нормабаш авылы янында агач утырту бара.

Халыкара Өлкәннәр көнен бәйрәм итү кысаларында бүген, 3 октябрьдә район Мәдәният йортында “Сезгә булган хөрмәтебез безнең йөрәк түрендә” дип аталган бәйрәм концерты була. Башлана 14 сәгатьтә, керү бушлай.

Шулай ук бүген “Олимп” Боз сараенда 12 сәгатьтән 14 сәгатькә кадәр “Боз өстендә бәйрәм” дигән массакүләм шуу уздырыла. Керү пенсия таныклыгы буенча, ирекле.

Бүген районыбызда зурлап өлкәннәр көне билгеләп үтелде. Башта бер төркем пенсионерлар – башлангыч ветераннар оешмасы җитәкчеләре һәм өлкән буын вәкилләре яңа салынып килүче Олыяз урта мәктәбе төзелешендә, Олыяз авылы музеенда, Түбән Шәмәрдәндәге мега-фермада, Пчеловодта Роберт Димитриевның гаилә фермасында булдылар. Соңыннан очрашу ресторанда әзерләнгән чәй өстәле артында дәвам итте. Кунакларны район Башлыгы Рауил Рәхмәтуллин тәбрик итте.

-Бүген районыбыз тулы канлы тормыш белән яши, һәр тармакта үсешкә ирешелә икән, монда сезнең - өлкән буын вәкилләренең дә өлеше зур. Өлкәннәребез бернәрсәгә дә битараф түгел, әле дә күбесе актив тормыш рәвеше алып бара. Хөкүмәтебез дә, үз чиратында, аларның тормыш-көнкүрешен яхшырту, социаль мәсьәләләрне хәл итү юнәлешендә максатчан эш алып бара. Яңа социаль объектлар сафка баса, сугыш ветераннарының торак шартлары яхшыртыла, - диде ул үзенең тәбрикләү сүзләрендә һәм бер төркем ветераннарга район Советының Мактау грамоталарын тапшырды.

Район башлыгы Рауил Рәхмәтуллин ветераннарны Өлкәннәр көне белән котлады.

-Сезнең яшәү рәвешегез, тормыш тәҗрибәгез урта буын һәм яшьләр өчен үрнәк булып тора. Тормыш юлыгыз батырлыкка тиң. Хезмәтегез, киңәшләрегез өчен зур рәхмәт сезгә. Тормышыгыз имин булсын, сау-сәламәт гомер кичерегез, - диелә котлауда.

Юл йөрү кагыйдәләрен Онытма син кич-иртә. Әти-әниең синең Сау кайтуыңны көтә.

1 октябрьдән Кукмарадагы 1нче гимназия базасында компьютерларга өйрәтү буенча ике айлык бушлай курслар эшли башлый.

     Курсларга 2-64-65 телефоны аша яки Ворошилов урамы, 44нче йортка килеп, социаль яклау бүлегендә язылырга мөмкин.