ЯҢАЛЫКЛАР
Бүген бистәбездә шатлыклы вакыйга – поселокның Гафиятуллин урамында “Тузган торакны бетерү” Федераль программасы кысаларында төзелгән йорт ияләренә тапшырылды. Өч катлы әлеге йортта 21 гаилә яшәячәк. Тантанада район башлыгы Рауил Рәхмәтуллин, “Татарстан Республикасы Президенты каршындагы Дәүләт торак фонды” коммерцияле булмаган оешмасының башкарма директоры Тәлгать Абдуллин, Мамадыш “Стройсервис” җәмгыятенең генераль директоры Илфат Хаҗиевлар катнашты.
Барлык уңайлыклар тудырылган, матур итеп, зәвык белән төзелгән әлеге йортта авырмыйча, исән-имин яшәргә язсын!
Йорт ачылу тантанасыннан репортажны район газетасының алдагы саныннан укый аласыз.
Красный Октябрь авылында яшәүче Ибраһимов крестьян фермер хуҗалыгы “Кукмара” сөте җитештерә башлады. Ул 3,2 майлылыкта, 900 граммлы пакетларда чыгарыла. Сөтне поселок кибетләреннән сатып алырга мөмкин.
Мәчкәрә урта мәктәбендә инде яз көне башланган капиталь ремонт тулы көчкә дәвам итә. Бүгенгә ике катлы бинаның тәрәзәләрен алмаштыру бара, түбәнең ярты өлеше ябылып беткән. Наумир Сәмигуллин исемен йөртүче әлеге белем йорты үз ишекләрен тәүге тапкыр 1974 елда ача һәм моңарчы бер тапкыр да капиталь ремонт күрми. Агымдагы уку елында Мәчкәрә урта мәктәбендә 105 бала укыган, 20 укытучы хезмәт куйган. Чыгарылыш сыйныфны 11 укучы тәмамлаган.
Бүген Кукмара мәдрәсәсе каршында оешкан җәйге лагерьның ябылу тантанасы узды. Дин сабаклары, кызыклы уеннар, бәйгеләр, Универсиада уңаеннан оештырылган спорт чаралары белән үрелеп барган әлеге лагерьда быел 100дән артык бала ял итте. Ябылу тантанасында исә “Иң актив”, “Иң тиз килеп җитүче”, “Иң тиз ашап бетерүче”, “Иң пөхтә киенеп йөрүче”, “Иң камил Коръән укучы” кебек номинацияләр буенча махсус бәйге үткәрелеп, балаларга истәлекле бүләкләр тапшырылды.
Кукмара элеваторында игеннәрне урып-җыюга хәзерлек мәсьәләләренә багышланган республика зона семинары булды. Анда катнашучылар элеваторның яңа ашлык кабул итүгә әзерлеге, хезмәт шартлары, янгын һәм хезмәт куркынычсызлыгы кагыйдәләренең үтәлеше белән таныштылар.
10 июльдә, 10-12 сәгатьләрдә Татарстан Росреестр идарәсенең Кукмара бүлегендә "Кайнар линия" эшләячәк.
Күчемсез милеккә хокукны һәм алар белән алыш-биреш итүләргә дәүләт теркәве үткәрү турындагы сорауларга бүлек җитәкчесе Люция Шәкертова, дәүләт җир контроле буенча сорауларга дәүләт җир инспекторы Ильяс Закиров җавап бирә.
"Кайнар линия" телефоны: 8 (84364) 2-64-01