ЯҢАЛЫКЛАР

Шушы көннәрдә башкалабызда V Бөтендөнья татар яшьләре корылтае узды. Форумда Кукмара районыннан делегат буларак Олыяз авылы кызы, үзе җырчы, үзе сәхнә остасы Римма Галиева белән без дә катнаштык.

Кукмара районы прокуратурасы экстремистлык эшчәнлегенә каршы тору турындагы законнарның үтәлешенә күзәтчелек итүне 25.07. 2002 елгы 114 санлы "Экстремистлык эшчәнлегенә каршы тору турында"гы Федераль закон һәм РФ Генераль прокурорының "Экстремистлык эшчәнлегенә каршы тору турындагы законнарның үтәлешенә прокурор күзәтчелеген оештыру турында"гы 19.11.2009 елгы 362 санлы приказы нигезендә башкара. Әлеге законның үтәлешенә күзәтчелек итү район прокуратурасы эшчәнлегенең мөһим юнәлешләреннән берсе булып санала. Бу хакта тәфсилләп сөйләвен үтенеп, район прокуроры М.Нәҗиповка мөрәҗәгать иттек.

Район мәгариф хезмәткәрләренең традицион август киңәшмәсен быел да яшь укытучылар башлап җибәрде. Кукмара 4нче урта мәктәбендә узган слетка төрле уку йортларын тәмамлаган 16 яшь белгеч чакырылган иде. Әлеге чарада мастер-класслар күрсәтелде, мөгаллим-мөгаллимәләр үзара фикер алышып, түгәрәк өстәл артында әңгәмә кордылар. Икенче көнне мәктәп директорлары, аларның укыту-тәрбия эшләре буенча урынбасарлары, аерым фән укытучылары секцияләргә бүленеп эшләделәр, быелгы киңәшмәнең төп темасы булган "Мәктәп - дәресләрдән соң" дигән проектны тормышка ашыру юллары хакында сөйләштеләр.

18 августта Азнакайда мөмкинлекләре чикләнгән кешеләр арасында җиңел атлетика ярышлары үтте. Анда Кукмарадан "Аргамак" командасы катнашты. Беренче булып йөз метрлы дистанциядә стартка хатын-кызлар басты. Анда иң өлкән спортчыларыбызның берсе Валентина Борисова финишка өченче булып килде. Урыннан озынлыкка сикерүдә дә ул шундый ук нәтиҗә күрсәтте. Ә инде 800 метрга йөгерүдә аңа тиңнәр булмады һәм пьедесталның беренче баскычына күтәрелде. Шулай итеп, В.Борисова бу ярышларда өч медаль алып кайтты.
Кукмара егете Азат Хәбибрахманов ядрә этәрүдә икенче, 200 метрга йөгерүдә өченче, ә урыннан озынлыкка сикерүдә беренче булды. Шулай итеп, Азат та бу ярышларда өч медаль яулады.
Ядегәр авылыннан фермер Райнур Әсхәдуллин 1500 метрга йөгерүдә бронза медаль иясе булды.
Ярышларда район данын яклап чыгыш ясаган Илнар Сабиров (Березняк), Валерий Николаев, Валерий Павлов (Ош.Юмья), Динар Галимуллиннар (Кукмара) команда уңышына үзләренең лаеклы өлешләрен керттеләр.