ЯҢАЛЫКЛАР

Кичәге көн Лубян авылында истәлекле вакыйгаларга бай булды. “Республиканың авыл юлларын төзекләндерү программасы” кысаларында 500 метр озынлыкта салынган асфальт юлны һәм һәм капиталь ремонттан соң участок дәваханәсен ачу тантаналары булды. Бу чараларда район җитәкчесе Сергей Димитриев һәм башка җитәкчеләр катнашты. Соңыннан авыл мәдәният йортында халык белән очрашу уздырылды.

“Авария хәлендәге торакны бетерү” программасы буенча Мирсәй Әмир урамында төзелгән өч фатирлы йортның ачкычлары хуҗаларына тапшырылды. Тантаналы чарада район җитәкчесе Сергей Димитриев, район Башкарма комитеты җитәкчесе урынбасары Азат Гарифуллин, поселок башкарма комитеты җитәкчесе Райнур Нотфуллин, “Строй –гарнт” оешмасы җитәкчесенең урынбасары Рөстәм Шәмсетдинов һәм башкалар катнашты.

22 июль көнне китапханәче Г. Загидуллина “Шәфкать” сәламәтләндерү үзәгендә дәваланучы яшүсмерләр өчен “Экологик марафон” дип аталган чара үткәрде.

21-22 июльдә Питрәч районы “Ак Барс-Питрәч” җәмгыяте базасында аппарат белән сөт саву осталарының республика конкурсы булды. Ярышларның флагын күтәрү хөрмәте районыбызның Вахитов исемендәге хуҗалыкның сыер савучысы Лидия Габдрахманова һәм Питрәч районыннан Гөлфия Фәйзрахмановага бирелде. Конкурс өч өлештән торды: сыер саву, теоретик өлеш һәм саву аппаратын сүтеп җыю. Әлеге конкурста чемпион исеменә райондашыбыз Лидия Габдрахманова лаек булды. Аны зур җиңүе белән котлыйбыз һәм хезмәтендә уңышлар телибез.

Авыл хуҗалыгында иң җаваплы чор – терлек азыгы әзерләү бара. Район авыл хуҗалыгы һәм азык-төлек идарәсеннән алынган мәгълүматларга караганда, бүгенге көндә район буенча шәхси хуҗалыкларга да өләшүне кертеп, 17200 тоннан печән әзерләнгән. Ә күмәк хуҗалыклар буенча бу сан - 11600 тонна.

Районыбызның бер төркем ветераннары Саба районында экскурсиядә булып кайттылар. Алар Сатыш авылындагы кәҗә фермасында, данлыклы Дендробакчада, Саба урманчылыгын үстерүгә зур өлеш керткән Нургали Миңнеханов музеенда, агач эшкәртү заводында, картлар йортында булганнар.

8-14 июль көннәрендә Кукмарабыздан Рәдиф хәзрәт Тимергалиев һәм Илсур хәзрәт Рәхмәтуллиннар Казанның Тынычлык мәчетендә бер төркем дин кардәшләре белән берлектә игътикафта (мәчеттә берөзлексез ун көн булу) булып кайттылар. Аларны мөфти Камил хәзрәт Сәмигуллин үзе чакырган.

Байлангар авыл җирлегенең Сазтамак авылында 1,700 м юл асфальтлау буенча эш алып барыла. Юл төзекләндерү эшләре федераль программа буенча башкарыла.

Дини оешма, мәдрәсә, хокук саклау органнары җитәкчеләре катнашында районда этноконфессия, миграция һәм иҗтимагый-сәяси хәлгә багышланган түгәрәк өстәл артында сөйләшү үткәрелде.

21 июль көнне район Советында ГКУ "Фонд газификации энергосберегающих технологий и развития инженерных сетей РТ" директоры Җ. Миннахметов һәм район җитәкчесе С. Димитриев катнашында индивидуаль җылыту системасына күчү мәсьәләсе буенча киңәшмә үтте.