ЯҢАЛЫКЛАР

Районыбызда өченче спорт корылмасы куллануга тапшырылды. Узган ел сафка баскан Олыяз урта мәктәбе янында төзелгән футбол кырын ачу тантанасында район башлыгы Рауил Рәхмәтуллин, “Урал” хуҗалыгы рәисе Газинур Хәбибрахманов, “Стройгарант” оешмасы җитәкчесе Илсур Шәрипов катнашты.

2 август көнне 9 сәгатьтән 11 сәгатькә кадәр Татарстан Республикасы юстиция министры урынбасары Мөхәррәм Мансурович Ибятов гражданнарны кабул итәчәк. Белешмәләр өчен телефон: 2-70-53.

30 июль көнне үзәк китапханә уку залы китапханәчесе Сәлимова Тәскирә Харисовна “Тылсым” халыкка социаль ярдәм күрсәтү үзәгендә дәвалану курсы узучы пенсионерлар каршында II яртыеллыкка язылган газета-журналларга күзәтү ясады.

Район Советында “Хезмәтне саклау буенча актуаль мәсьәләләрне яктырту һәм эш шартларының торышын, хезмәт, пенсия законнарындагы үзгәрешләрне камилләштерү” темасына багышланган семинар үткәрелде.

29 июль көнне Лубян авыл җирлегендә районның социаль-экономик үсеше буенча 2014 елның I яртыеллыгы нәтиҗәләренә һәм II яртылыкка бурычлар турында халык җыены булды. Анда Башкарма комитет җитәкчесе урынбасары Ләйсән Мингазова катнашты һәм чыгыш ясады.

Бу атнада районыбызда Татарстан Республикасы прокуроры Илдус Нафиков булып китте. Ул гражданнарны кабул итеп, аларның сорауларына җавап бирде, булган проблемаларны хәл итү өчен алынган мөрәҗәгатьләрне тиешле оешмаларга юллады. Аннан соң ул район җитәкчелеге, прокуратура хезмәткәрләре, хокук саклау, башкарма һәм күзәтчелек итү органнары җитәкчеләре катнашында киңәшмә үткәреп, һәрберсенең эшчәнлеге белән танышты, киләчәккә төгәл бурычлар билгеләде.

Әйе, Зур Кукмара авылындагы футбол мәйданчыгында туп типкән малайлар арасында данлыклы “Рубин” футбол командасында уйнарга хыялланучылар да бардыр. Алар моны үзләре дә яшермиләр. “Ясалма чирәмдә уйнавы үзе үк рәхәт, тигез, егылсаң да авырттырмый”, - диләр буш вакытларында “Ялкын” спорт клубы каршында төзелгән футбол мәйданчыгына ашыгучы яшүсмерләр.

28 июль көнне терлек азыгы әзерләү һәм игеннәрне югалтларсыз җыеп алуны оештыру буенча оешкан штаб утырышы булды. Әлеге киңәшмәдә уңышны вакытында һәм югалтуларсыз җыеп алу турында сүз барды.

28 июль көнне район Советының кече залында республика һәм федераль программаларны тормышка ашыру буенча подряд оешма җитәкчеләре белән киңәшмә узды. Әлеге чарага мәктәпләрдә һәм күпкатлы йортларда капиталь ремонт, мәдәният йорты һәм балалар бакчалары төзелеше өчен җаваплы иптәшләр чакырылган иде. Район Башлыгы әлеге эшләрне вакытында һәм сыйфатлы итеп тәмамларга бурыч куйды.

26 июль көнне Зур Кукмара авыл җирлегендә районның социаль-экономик үсеше буенча 2014 елның I яртыеллыгы нәтиҗәләренә һәм II яртылыкка бурычлар турында халык җыены булды. Анда Башкарма комитет җитәкчесе урынбасары Ләйсән Мингазова катнашты һәм чыгыш ясады.