ЯҢАЛЫКЛАР

Аш-Буҗи авылы китапханәсендә татар әдәбиятына һәм сәнгатенә мәхәббәт тәрбияләү максатында “Мәдәният дөньясында” дигән интеллектуаль уен-марафон үткәрелде һәм шул исемдәге презентация күрсәтелде. Әлеге уенда, “Тапкырлар” һәм “Зирәкләр” командаларына бүленеп, 2нче, 4нче сыйныф укучылары катнашты. Алар язучылар һәм композиторлар иҗаты белән таныштылар, Казандагы театрлар турында мәгълүмат алдылар, табышмакларга җавап бирделәр, көйләрне тануда ярыштылар. Бу чара “Туган тел” җыры һәм бүләкләүләр белән тәмамланды.

Башкалабыз Казанда республика яшьләренең телевизион “Йолдызлык” эстрада сәнгате фестиваленең Гала -концерты узды. Әлеге фестивальдә “Вокаль ансамбльләр” номинациясендә “Глория” җыр-бию ансамбле 2нче дәрәҗә лауреат исеменә лаек булды. Җитәкчесе Миләүшә Сәлимгәрәева. Кукмара балалар сәнгать мәктәбенең “Импульс” җыр-бию ансамбле дипломант исеменә лаек булды. Җитәкчесе Лилия Нурмиева, хореографы Роза Бадышева. “Вокал-соло” номинациясендә Зөбәйдә Хәмәтдинова шулай ук дипломант исемен яулады .Җитәкчесе Лилия Хөснетдинова, хореографы Альмира Шәймәрданова. “Конферанс” номинациясендә Айгөл Комарова, Зөлфәт Юскаев та дипломант булдылар. Җитәкчеләре Регина Ваккасова. Ә Венера Гыйлаҗева җитәкчелегендәге “Выше радуги” җыр-бию ансамбле “Пирамида” мәдәни-күңел ачу комплексында оештырылган бәйрәм концертында катнашу өчен чакырылды.

19 апрель көнне Өркеш авыл җирлегендә “Моңнар кайтсын авылга” фестивале үтте. Авыл үзэшчәннәре тамашачыларга “Мәтрүшкәле чәй” спектаклен тәкъдим иттеләр.

“Моңнар кайтсын авылга” фестиваль конкурсы кысаларында Ядегәр авыл җирлеге мәдәният хезмәткәрләре белән берлектә Флорид Бүләковның “Әбиләргә ни җитми” спектаклен куйдылар. Төп рольләрне хезмәт ветераннары уйнады.

Кукмара районында Мәдәният елына багышланган “Моңнар кайтсын авылга” дип аталган фестиваль конкурс дәвам итә. 17 апрель көнне Түбән Үрәс мәдәният йорты хезмәткәрләре авыл җирлеге коллективы белән берлектә Туфан Миңнуллинның «Ай булмаса йолдыз бар» спектаклен куйдылар.

23 апрель көнне “Тылсым” халыкка социаль ярдәм күрсәтү үзәгендә “Патриот” программасы кысаларында “Шатлык өләшәбез” дип аталган чара үткәрелде. Әлеге чарада ОСПСиДда исәптә торучы балалар һәм волонтерлар катнашты, Алар ветераннар өчен үз куллары белән открыткалар әзерләделәр.

23 апрель көнне “Язгы шәфкатьлелек атнасы” кысаларында “Тылсым” халыкка социаль ярдәм күрсәтү үзәге һәм Кукмара волотерлары белән берлектә “Ничек яшисең, ветеран?” акциясендә катнаштылар.

Арчада “Сәламәтлек” XI авыл Спартакиадасы кысаларында кул көрәше буенча ярыш узды. Анда үз үлчәү авырлыкларында Рүзия Габдрахманова, Ринат Сөләйманов – беренче, Рөстәм Муратов – икенче, Вероника Смирновалар өченче урыннарны яуладылар.

Әдәбият-сәнгать сөючеләр игътибарына!

28 апрельдә, 12.00 сәгатьтә Кукмара үзәк китапханәсендә Габдулла Тукайның туган көненә багышланган әдәби-музыкаль кичә оештырыла. Анда җирле шагыйрьләр, язучылар белән очрашу булачак. Районыбыз шагыйрьләре, композиторлар иҗат иткән җырлар яңгыраячак. Кичәгә керү ирекле. Рәхим итегез!

Районның барлык хуҗалыкларында һәм агрофирмаларда язгы кыр эшләре башланып китте. Бүгенге көндә күпьеллык үләннәрне тырмалау һәм тукландыру, уҗым басуларына ашламалар кертү, туңга сөрелгән җирләрдә дым каплату бара.