ЯҢАЛЫКЛАР

25 апрель көнне Кукмара мөмкинлекләре чикләнгән балалар һәм яшүсмерләр өчен “Шәфкать” сәламәтләндерү үзәгендә инвалид балалар өчен һөнәри юнәлеш бирү буенча конференция узды.

25 апрель көнне Кукмара №4 мәктәбе базасында Иҗади үсеш һәм гуманитар белем бирү үзәге белән берлектә рус теле һәм әдәбияты укытучысы Муртазина Кәүсәрия Мәхмутовнаның якты истәлегенә багышланган районара шигырь укучылар бәйгесе узды. Мәктәп коллективы, туганнары укытучы искә алдылар.

“Шәфкать” сәламәтләндерү үзәгендә тозлы камырдан әвәләп ясау буенча түгәрәк эшли. Түгәрәкнең җитәкчеләре II коррекционной группы тәрбиячеләре Мухамадеева З.Г., Сафиуллина А.Г. Тәрбиячеләр һәр балага аерым якын килеп эшлиләр. Апрель аенда татар халык шагыйре Г. Тукай иҗатына багышлап күргәзмә оештырдылар.

“Шәфкать” мөмкинлекләре чикләнгән балалар өчен сәламәтләндерү үзәгендә татар халык шагыйре Г. Тукай әкиятләренә рәсем конкурсы булды. Балалар зур теләк белән “Шүрәле”, Су анасы”, “Кәҗә белән Сарык” әкиятләренә иллюстрацияләр ясадылар.

“Кояшкай” социаль приютыннан бер төркем балалар тыл ветераны Якупова Зөлхәбирә белән берлектә Яр Чаллы шәһәрендә сәяхәттә булып кайттылар. Алар анда Бөек Җиңүнең 69 еллыгына багышланган “Брейн-ринг – 2014” дип аталган интеллектуаль уенда катнаштылар. Уеннан соң балалар Дельфинарийга бардылар.

23-24 апрель көннәрендә “Олимп” балалар һәм яшүсмерләр мәктәбенә йөрүче балалар Чистай шәһәрендә узган фигуралы шуу буенча ачык Беренчелектә катнаштылар.

1-2 май көннәрендә “Олимп” боз сараенда Бөек Җиңүгә багышланган ветеран командалар арасында хоккей буенча сайлап алу уеннары үтә.

Бүген Кукмарага Татарстан Республикасы буенча Эчке эшләр министрлыгының ведомстводан тыш сакчылык Идарәсе федераль казна учреждениесе начальнигы, полиция полковнигы Марат Шакиров, ветераннар советы рәисе Валерий Харитонов килде. Башкала кунаклары Россия Эчке эшләр министрлыгының Кукмара районы буенча бүлегендә район ведомстводан тыш сак бүлекчәсенең беренче кварталдагы эшчәнлеге буенча уздырылган киңәшмәдә катнаштылар, сугыш ветераны, озак еллар Кукмараның ведомстводан тыш сак бүлекчәсен җитәкләгән Василий Антиповны 90 яшьлек юбилее белән котладылар.

Нур Баян, Гафиятуллин, Ленин, Степан Разин урамнарындагы 19 йорт быелдан башлап индивидуаль шәхси җылылык системасына күчәчәк.

Хәтерлим әле, моннан берничә ел элек республикада әлеге программа старт алгач, Маяковский урамында яшәүче бер танышым: “Нәрсәгә кирәк ул мичләр, беренчедән - бәясе кыйммәт, икенчедән - күпме пычрак эше бар”, -дигән  иде. Ә шул ук вакытта редакциягә: “Кайчан безнең йортны да әлеге программага кертерләр икән?”- дигән хатлар да килде. Бүгенге көндә исә әлеге танышым икенче төрле фикер йөртә: “Рәхәт нәрсә икән ул үзе. Кирәк чакта кабызып җибәрәсең, фатирың җылынып китсә - сүндерәсең.  Элек бит җылылык сезоны кайчан башланыр инде дип, тилмереп көтә идек. Килешү нигезендә барлык сумманы җиде елга бүлеп түләргә тиешбез, ике елы калып бара”, - диде ул.

Каләм тибрәтүче балалар, үсмерләр һәм яшьләрнең республика “Алтын каләм” фестивале быел унтугызынчы тапкыр уздырыла. Фестивальнең төп темасы: “Яшьләр һәм дәүләт”. Язмалар шулай ук түбәндәге махсус темалар буенча кабул ителә: “Яшьләр толерантлык өчен һәм экстремистлыкка каршы”, “21 гасырда патриотлык: традицияләр яки инновацияләр”, “Волонтер - әйләнә- тирә дөньяны яхшыга үзгәртүче кеше ул” һәм башкалар.