ЯҢАЛЫКЛАР

21-23 апрельдә “Тылсым” халыкка социаль ярдәм күрсәтү үзәгендә Кукмара туган якны өйрәнү музее “Бу елларны онытырга мөмкин түгел” дип аталган күргәзмә оештырды. Әлеге күргәзмәдә 39 экспонат күрергә була иде: солдат хатлары, солдат каешы, кобура, фляга, чиккән кулъяулык, фоторәсемнәр һ.б..

21 апрель көнне Түбән Өскебаш авылы урта гомуми белем бирү мәктәбендә Бөек Җиңүнең 70 еллыгына багышланган сугыш һәм тыл ветераннары белән очрашу булды. Әлеге чарада район ветераннар советы рәисе М. Мансуров, инвалидлар оешмасы рәисе Р. Нигъмәтҗанов, ветераннар советы членнары, җирлек башлыгы Н. Мөхәммәтҗанов катнашты һәм чыгыш ясады. Очрашу укучылар өчен бик файдалы булды.

22 апрель көнне Аш-Буҗи авыл китапханәсендә “Мәдәният дөньясында” дигән интеллектуаль уен-марафон үткәрелде. Бәйрәмне Ярмиева Алсу алып барды. 2, 4 сыйныф укучыларыннан 12 бала катнашты.

Олыяз авылында әле узган ел гына сафка баскан урта мәктәп бинасын могҗиза дими – ни дисең! Әлеге әкият дөньясын үзе килеп күрмәгәннәр аңлый да, күз алдына да китерә алмый.

Мөмкинлекләре чикләнгән затлар арасында өстәл теннисы буенча республика чемпионаты үткәрелде. Байлар Сабасы спорткомплексында үткәрелгән әлеге ярышларда безнең районның “Аргамак” командасы да катнашты, дип хәбәр итте әлеге команда җитәкчесе Дамир Галиәхмәтов.

Санитар-экологик икеайлык кысаларында районда тирә-якны җыештыру буенча өмәләр башланды. Байлангар һәм Мамашир авыл җирлекләрендә территорияне җыештыру буенча өмәләр үтте инде.

19 апрель көнне А.М. Булатов исемндәге күппрофильле лицеенда булачак беренче класс балалары һәм аларның әти-әниләре белән очрашу булды. Актлар залында укучылар һәм укытучылар көче белән әзерләнгән концерт булды. Аннан соң балалар спорт залына киттеләр, биредә физкультура укытучылары “Күңелле стартлар” үткәрде. Ә әти-әниләр өчен җыелыш үткәрелде.

18 апрель көнне Казан шәһәре Яңа Савин районы №7 Гимназиясендә XII республикакүләм Л.Н. Толстой исемендәге фәнни-гамәли конференция үтте. Иҗади үсеш һәм гуманитар белем бирү үзәге укучысы Маляева Гузәл (җит. Шарифуллина Н.Б.) “Быть человеком” дип исемләнгән фәнни эш тәкъдим итте һәм беренче урын яулады.

“Бөтенрусия яхшылык атнасы” кысаларында Кукмара бистәсендә "Добровольцы- детям", " Наша общая Победа" акцияләре уза. Әлеге акциягә Кукмара №4 мәктәбе укучылары да бик теләп катнаша. Шимбә көнне башка мәктәп укучылары белән беррәттән “Спасая жизни” акциясендә катнашып, үтеп баручыларга буклетлар, флажоклар өләштеләр, донор булуның үзенчәлекләрен аңлаттылар.

“Уникс” концертлар залында XIV ачык Республикакүләм "Созвездие-Йолдызлык-2014" телевизион яшьләр фестиваленең гала-концерты үтте. Вокал-хореографик ансамбль “Импульс” (җит. Нурмиеева Л.И., хореограф Бадышева Р.М.) дипломант исеменә лаек булды.