ЯҢАЛЫКЛАР
13 ноябрь көнне Зур Сәрдек авылы китапханәсенә балалар бакчасына йөрүче нәниләр (17 бала) тәрбияче апалары белән экскурсиягә килделәр. "Салават күпере" журналының соңгы санына күзәтү ясаганнан соң, алар өчен "Ачык сәхнә" оештырылды. Һәр бала үзе белән таныштырганнан соң, өйрәнеп килгән шигырен сөйләде. Ә без - тамашачылар булдык. Урында утыручы балалар чыгыш ясаучы балага сораулар бирделәр. "Хәзер елның кайсы фасылы?", "Син нинди республикада яшисең?", "Шүрәле" әкиятен кем язган?", "Герой шагыйрьне беләсеңме?", "Газинур Морат кем ул?", "Татарстан флагы нинди төсләрдән тора?", "Син кемнәр белән яшисең?" кебек сорауларга балалар бик матур җаваплар бирделәр. Чыгыш ясарга чыккан һәр балага иптәшләре мактау сүзләре әйтеп зурладылар. Мәсәлән, "Ясминә матур", "Камилә уңган" , "Иделия тапкыр!", "Госман тәртипле", "Дамир тиктормас", "Мәүлет маладис!" дип иптәшләренең күңелләрен күрделәр. Һәр бала чыгыш та ясады, сорау да бирде. Бу шөгыль балаларның үзләренә дә бик ошады. Ахырдан фойега төшеп хәрәкәтле уеннар оештырдык.
Бүген Кукмара муниципаль районы Советының утырышлар залында икенче чакырылыш Кукмара район Советының 31нче сессиясе узды.
Көн тәртибендә түбәндәге мәсьәләләр каралды:
1.Кукмара муниципаль районының 2014 елга һәм планлы 2015 һәм 2016 елларга социаль-икътисадый үсешенең фаразы турында.
2.Кукмара муниципаль районының 2014 елга һәм планлы 2015 һәм 2016 елларга бюджеты проекты турында.
Районыбызның иң интеллектуаль укучыларын ачыклау һәм аларны тагын да үстерү максатында, 5 ноябрь көнне Кукмара А.М. Булатов исемендәге күппрофильле лицее базасында 9-11 сыйныф укучылары арасында интеллектуаль чемпионат үткәрелде.
Районыбызның “Иң интеллектуаль укучылары” дип түбәндәге укучылар игълан ителделәр:
- Гиниятуллин Булат – Кукмара №3 урта гомуми белем бирү мәктәбенең 9 сыйныф укучысы;
- Баллеева Елена – Кукмара №3 урта гомуми белем бирү мәктәбенең 10 сыйныф укучысы;
- Галеев Ильдар – Кукмара №3 урта гомуми белем бирү мәктәбенең 10 сыйныф укучысы;
- Хабибрахманов Алмаз – Кукмара А.М. Булатов исемндәге күппрофильле лицееның 11 сыйныф укучысы.
Җиңүчеләрне котлыйбыз, уңышлар телибез!
13 ноябрьдә “Просто молоко” идарә компаниясе генераль директорының агропромышланность комплексы буенча Беренче урынбасары И.Н. Сулайманов белән очрашу булды. Анда Район Башлыгы Рауиль Рахматуллин катнашты. Утырыш барышында районда авыл хуҗалыгы тармагына караган мөһим мәсьәләләр каралды.
Кичә район Советының кече залында “Бердәм Россия” Кукмара җирле бүлеге партиясенең политсовет утырышы узды. Анда “Бердәм Россия” Кукмара җирле бүлеге партиясе XVI Конференциясенең беренче этабын, инвалидлар көненә багышланган чаралар үткәрү турында карар кабул ителде. Шулай ук “Бердәм Россия” партиясенә әгъзалар кабул ителде.
10 ноябрь көнне “Зилант” спорткомплексында традицион көзге йөзү буенча ярышла үтте. Анда 15 кыз һәм 45 малай катнашты. 2004-2005 елгылар арасында 1 урында Артемьева Диана һәм Ланилов Андрей, 2 урында Хасанова Дина һәм Садрутдинов Ильфар, 3 урында Измайлова Гульшат һәм Камалиев Сәйдәш. 2002-2003 елгылар арасында 1 урында Шарипова Ильфира һәм Якупов Аяз, 2 урында Гарипова Алия һәм Данилов Андрей. 3 урында – Шайхутдинова Лейсан һәм Габдрахманов Адель. 2000-2001 елгылар арасында 1 урында Галимьянова Алия һәм Шаймарданов Сәйдәш, 2 урында Фахрутдинов Алмаз һәм 3 урында Хисматуллин Ильсаф. 1998-1999 елгылар арасында 1 урында Гайнанова Диляра һәм Васильев Никита, 2 урында Перова Катя һәм Галиев Алмаз, 3 урында Фаляхутдинова Ирада. 1997 һәм өлкәнрәкләр арасында 1 урында Гарифзянов Фарид, 2 урында Миргалиев Ильяс, 3 урында Назаров Никита. Җиңүчеләне котлыйбыз!
Чуллы авылында зират чистарту өмәләре бара. Әлегә биредәге корыган агачлар киселеп, мәчеткә ягулык итеп хәзерләнгән. Киселгән агачларны мәчет территориясенә үз йөк транспортлары белән Алмаз Нигъмәтуллин һәм Минһаҗевлар гаиләсе ташыган. Шулай ук зиратның искергән коймаларын да яңага алмаштырырга җыеналар. Зират эченнән төрле чүп-чар да чыгарылачак.
Районыбызның мәктәп директорлары, укытучылар, техник хезмәткәрләр – барлыгы 150 кеше - район мәгариф идарәсе җитәкчесе Роберт Мансуров белән берлектә, Олыяз авылында төзелә торган яңа мәктәп бинасының әйләнә-тирәсен тәртипкә китерүдә ярдәм иттеләр. Мәктәп директорлары бүләккә дип алып килгән 10 төп туя агачы һәм артыш куаклары утыртылды.
Якшәмбе көнне, 10 ноябрьдә, өмәгә әти-әниләр килде. Алар парта-урындыкларны җыйдылар, тәрәзәләрне юдылар, территориядә дә кызу эш кайнады. Балалар бакчасы хезмәткәрләре исә тәрәзәләргә пәрдәләр элделәр.
Олыяз урта мәктәбе коллективы исеменнән өмәдә катнашкан һәркемгә зур рәхмәтебезне җиткерәбез, эшләрендә, тормышларында уңышлар телибез.