ЯҢАЛЫКЛАР

Район Башлыгы урынбасары Равия Каримуллина  һәм социаль яклау бүлеге начальнигы Светлана Замалиева Уразай авылында  яшәүче Ибраһимова Гөлбану апаны 90 яшьлек юбилее белән котладылар.  Аңа Россия Федерациясе Президентының котлау хатын, район Башлыгының  Рәхмәт хатын, истәлек бүләге тапшырдылар, бәхетле озын гомер, ныклы сәламәтлек теләделәр.

Бүген район Советы бинасында өченче чакырылыш Кукмара район Советының дүртенче сессиясе булды. Көн тәртибендә районның 2016 елга социаль-икътисадый үсеше фаразы, 2016 елга район бюджеты проекты (беренче укылыш), район Уставына үзгәрешләр кертү проекты турындагы мәсьәләләр каралды. Сессияне район башлыгы Сергей Димитриев алып барды һәм йомгаклап чыгыш ясады.

13 ноябрь көнне балалар китапханәчесе Фирдания Закирова Кукмара №4 мәктәбенең 1б сыйныф укучылары өчен Китаплар шәһәренә экскурсия оештырды.Балалар игътибар белән китапханәченең китапханә турында мавыктыргыч итеп сөйләгәнен тыңладылар, виктоина сорауларына җавап бирделәр, табышмаклар чиштеләр.  

Якынлашып килүче инвалидлар көне уңаеннан Биектау районының “Байтик” сәламәтләндерү лагеренда армрестлинг буенча республика ярышлары үтте. Анда районыбызның “Аргамак” командасы да катнашты. 70 килограммнан югары үлчәүдәге хатын-кызлар арасында Кукмарадан Ләбибә Талипова беренче урынны алды.

“Тылсым” халыкка комплекслы социаль ярдәм күрсәтү үзәгендә волонтер, КУкмара №3 мәктәбе укучысы Васильева Кристина «Создавая красоту – создай себя» программасы кысаларында бисердән эшләнмәләр ясау  буенча дәресләр үткәрә. Әлеге дәресләрдә балалар иҗади сәләтләрен үстерәләр, фикерләү күнекмәләрен ныгыталар.

5-8 ноябрь көннәрендә Казан шәһәрендә “Виктория” балалар иҗатын үстерү Фонды тарафыннан  “Содружество талантов” балалар һәм яшүсмерләр иҗатының VII Халыкара конкурс-фестивале уздырылды. 7 ноябрьдә ТР Эчке эшләр Министрлыгының Мәдәният үзәгендә конкурста катнашучыларны тыңладылар.

6 ноябрь көнне тәрбиягә алган һәм  опекун булган гаиләләрдән 26 бала өчен Казанга сәяхәт оештырылды.Алар анда “Әкият”  татар Дәүләт курчак театрында булдылар, аның эшчәнлеге белән таныштылар. Шулай ук, “Туган як” комплексында ял иттеләр.

10 ноябрь көнне Казан шәһәренең В.И.Ленин исемендәге мәдәни – ял комплексының сәхнәсендә   XV Төбәкара халык театрларының фестивален тантаналы ачу чарасы узды.  Беренче чыгыш ясау хокукы, бу фестивалҗнең ике  Гран – при бүләгенә ия булган,  Кукмара халык театрына бирелде. Коллектив Туфан Миңнуллинның “Гөргөри кияүләре” спектаклен Казан тамашачысына тәгъдим итте һәм бик җылы кабул ителде.

8 ноябрьдә “Зилант” спорт комплексында “Зилант” спорт мәктәбенең йөзү буенча  Көзге Беренчелеге үтте. Җиңүчеләр һәм призлы урыннарны алучылар грамоталар һәм кыйммәтле бүләкләр белән бүләкләнделәр.