ЯҢАЛЫКЛАР

Районыбызның бер төркем ветераннары Саба районында экскурсиядә булып кайттылар. Алар Сатыш авылындагы кәҗә фермасында, данлыклы Дендробакчада, Саба урманчылыгын үстерүгә зур өлеш керткән Нургали Миңнеханов музеенда, агач эшкәртү заводында, картлар йортында булганнар.

8-14 июль көннәрендә Кукмарабыздан Рәдиф хәзрәт Тимергалиев һәм Илсур хәзрәт Рәхмәтуллиннар Казанның Тынычлык мәчетендә бер төркем дин кардәшләре белән берлектә игътикафта (мәчеттә берөзлексез ун көн булу) булып кайттылар. Аларны мөфти Камил хәзрәт Сәмигуллин үзе чакырган.

Байлангар авыл җирлегенең Сазтамак авылында 1,700 м юл асфальтлау буенча эш алып барыла. Юл төзекләндерү эшләре федераль программа буенча башкарыла.

Дини оешма, мәдрәсә, хокук саклау органнары җитәкчеләре катнашында районда этноконфессия, миграция һәм иҗтимагый-сәяси хәлгә багышланган түгәрәк өстәл артында сөйләшү үткәрелде.

21 июль көнне район Советында ГКУ "Фонд газификации энергосберегающих технологий и развития инженерных сетей РТ" директоры Җ. Миннахметов һәм район җитәкчесе С. Димитриев катнашында индивидуаль җылыту системасына күчү мәсьәләсе буенча киңәшмә үтте.

20 июль көнне “Нараткай” сәламәтләндерү лагеренда “Без сәламәт яшәү рәвеше яклы” акциясе кысаларында мәдәният һәм яшьләр эшләре Идарәләре тарафыннан мәдәни-спорт чарасы үтте.

Кукмараның Ленин, Чехов урамнарында яшәүчеләрнең җыены үткәрелде. Бу чарада сүз ишегалларында балалар мәйданчыклары булдыру, эскәмияләр, яктырткычлар кую турында барды. Чүп савытларын урнаштыру өчен махсус урыннар булырга тиешлеге дә ассызыкланды. Әлеге эшләрне башкару өчен тиешсез рәвештә урнаштырылган гараж-сарайларны сүтәргә кирәклеге әйтелде. Очрашуда район җитәкчесе Сергей Димитриев, район башлыгы урынбасары Равия Каримуллина, район Башкарма комитеты җитәкчесе урынбасары Азат Гарифуллин, поселок башкарма комитеты җитәкчесе Райнур Нотфуллин һәм башкалар катнашты.

Кнәбаш авлында яшәүче Минибаев Минни Гали улына 90 яшь тулды. Юбилярны Район башлыгы урынбасары Равия Каримуллина котлады.

Татарстанда 30 үзенчәлекле республика Президент программалары тормышка ашырыла. Аларның берсе – “Балалар бакчалары төзү”, аның кысаларында Яр Чаллы каласында бакча сафка басты. 6 июльдә бу бакчаны ачу тантанасында Татарстан лидеры Рөстәм Миңнеханов катнашты. Әлеге программа мәктәпкәчә белем бирү учреждениеләренә чиратларны бетерүне күздә тота. Соңгы биш ел эчендә Татарстанда республика бюджеты хисабыннан 200 мәктәпкәчә учреждение ачылды, шуларның 118е – өр-яңа, калганнары ремонттан соң.

“Тылсым” үзәгендә ял итүче олы яшьтәге гражданнар һәм ветераннар “Изге эшләр эстафетасында” актив катнаштылар .