ЯҢАЛЫКЛАР

Түбән Камада киокусинкай каратэ буенча шәһәр беренчелегендә Зур Кукмараның “Ялкын” спорткомплексында шөгыльләнүчеләр дә катнашты. Турнирда республиканың төрле шәһәрләреннән һәм Ульяновск, Димитовград, Ижевск, Сарапул, Самара шәһәрләреннән 12-15 яшьлек 115 спортчы көч сынашты. Туешбаш авылыннан Халит Хәләүтдинов (тренеры Алмаз Гәләветдинов) үз үлчәү авырлыгында икенче урынны алды.

Нырты урта мәктәбенең 6 сыйныф укучылары Алинә Галимуллина, Эльмир Мирзагаянов, Азат Фатыховлар (җитәкчеләре Гөлнара Мирзагаянова) “Яңа гасыр” телерадиокомпаниясенең “Тамчы-шоу” тапшыруында катнашып, җиңү яулап кайттылар.

Район Советының законлылык һәм хокук тәртибе, икътисади сәясәт һәм бюджет буенча даими комиссияләренең, район иҗтимагый Советының берләштерелгән утырышы үткәрелде.

Зур Сәрдек халык театры Туфан Миңнуллинның “Без бит авыл малае” спектаклен Чуллы, Вахит, Олыяз, Зур Сәрдек, Аш-Буҗи, Яңа Сәрдек авылы тамашачыларына тәкъдим итте.

Татарстан Дәүләт Советының 20 еллыгы уңаеннан 22 ноябрьгә кадәр белем йортларында “Законнар монда туа” дигән темага парламент дәресләре уза. Дәресләрдә, сыйныф сәгатьләрендә укучылар законнар, конституция, хакимият органнары, депутатлар һәм аларның җәмгыятьтәге роле хакында сөйләшәләр, үзләрен кызыксындырган сорауларга җаваплар алалар.

Лубян мәдәният йортында “Студентлар көзе” дигән чара узды. Бәйрәмне Лубян урман-техник көллияте укучылары оештырды.

Казанның Сәид Галиев исемендәге мәдәният йортында халык театрлары арасында узучы “Идел йорт” республика бәйгесенең йомгаклау этабы узды. Әлеге чарада район халык театры Туфан Миңнуллин әсәре буенча куелган “Бәйләнчек” спектаклен тәкъдим итте.

Урта Комар авыл җирлегендә үзара салым акчалары хисабына Салкын Чишмә авылы зираты коймасын ремонтлау дәвам итә.

Бөтендөнья балалар хокукы көнен билгеләп, 19 ноябрь көнне балалар китапханәсендә №1 Гимназиянең 4 сыйныф укучылары өчен китапханәче Нурия Гайнетдинова “Белем иленә сәяхәт” дип аталган дәрес үткәрде. Балалар презентация слайдлары ярдәмендә әкият иленә сәяхәт кылдылар.

19 ноябрь көнне “Шәфкать” халыкка комплекслы социаль ярдәм күрсәтү үзәге хезмәткәре Ф.А. Гателганиева һәм социаль педагог М.Р. Ахмадеева тарафыннан “С чистого листа” программасы кысаларында “Посмотри в глаза ребенку” темасына чара үткәрелде. Чараның максаты бала тәрбияләүдә ата-ананың авторитеты торганың күрсәтү иде.