ЯҢАЛЫКЛАР

Зур Кукмара авылының “Шатлык” балалар бакчасында тәрбияләнүче балалар өчен татар халкының йөзек кашы булган бөек шагыйребез Габдулла Тукайның тууына 128 ел тулуга багышланган чара үткәрелде.
Зал Тукай портреты, әсәрләре буенча эшләнгән иллюстрацияләр белән бизәлгән иде.

30 апрель көнне КЦСОН “Тылсым”да Бөек Ватан сугышы ветераннары белән очрашу булды. Социаль педагог М. Ахмадееваның сәламләү сүзеннән соң ветераннар сугыш еллары хәтирәләре белән уртаклаштылар. Ветераннар өчен концерт куелды, “Чтобы помнили” дип аталган фотоколлаж ясалган иде. Ахырдан ветераннарга бүләкләр тапшырылды.

25 нче апрельдә №1 Ч.Т. Айтматов исемендәге гимназиядә Г.Тукайның тууына 128 ел тулу һәм 2014 нче ел Россия Федерациясендә Мәдәният елы дип игълан ителү уңаеннан, “Шигърият бәйрәме” үткәрелде. Бәйрәмдә Г.Тукай әкиятләре сәхнәләштерелде, шагыйрьнең җырлары һәм шигырьләре яңгырады.

Балалар шуклыгы нәтиҗәсендәге янгыннарны кисәтү, ут чыганакларына карата дөрес мөнәсәбәт тәрбияләү, янгын чыккан очракта балаларда үзләрен дөрес тоту күнекмәләрен формалаштыру һәм ныгыту, сәләтле балалар белән эшләүне камилләштерү максатында Кукмара янгын күзәтчелеге бүлеге иң яхшы иҗат эшләренә конкурс үткәрде.

29 апрель көнне “Шәфкать” мөмкинлекләре чикләнгән балаларны һәм яшүсмерләрне сәламәтләндерү үзәгендә “Балачак – күңелле чак” дип аталган чара үтте. Балалар җырлар җырладылар, төрле уеннарда һәм конкурсларда катнаштылар, табышмаклар чиштеләр, шигырьләр сөйләделәр. Актив катнашканнары өчен балаларга дипломнар һәм призлар тапшырылды.

29 апрель көнне “Тылсым” халыкка социаль ярдәм күрсәтү үзәгенең сәламәтләндерү бүлегендә татар халык шагыйре Габдулла Тукайның 128 еллыгына багышланган “Шагыйрь эзләре буйлап” дип аталган тематик кичә булды. Ял итәргә килгән ветераннар каршында китапханәче Салимова Тәскирә чыгыш ясады. Бергәләп Г. Тукайның тормыш юлын, шигырьләрен искә төшерделәр.

«Тылсым» халыкка комплекслы социаль ярдәм күрсәтү үзәгендә Бөек Ватан сугышы ветераннары һәм Чернобль атом электр станциясе авариясе нәтиҗәләрен юк итүдә катнашучылар өчен өч атналык кабул итүләр оештырылды. Парикмахер-стажер Шахтина Кристина «Шәфкатьлелек атналыгы» кысаларында алар өчен бушлай хезмәт күрсәтте. Шулай ук ялгыз яшәүче гражданнарның өйләренә барып хезмәт күрсәтте.

Җирле үзидарә көнен билгеләп үтү кысаларында , Кукмара муниципаль районы авыл җирлеге башлыклары, Район Башлыгы Равия Каримуллина җитәкчелегендә, Болгар җирендә булып кайттылар. Бөек Болгарның истәлекле урыннары белән танышып, үзләренә онытылмаслык хәтирәләр алып кайттылар.

Кукмараның “Чулпан” балалар бакчасында “Яшь янгын сүндерүче” дигән чара үткәрелде. “Янгын сүндерүчеләрне чакыру”, “Янгын сүндерү шлангын җыю” һәм башка төрле уеннар оештырылды. Бирегә Кукмара районы буенча янгын күзәтчелеге бүлеге дознавателе Эльбрус Әхмәтҗанов килде.