ЯҢАЛЫКЛАР

Балтачта мәгариф хезмәткәрләренең кышкы спартакиадасының финал ярышлары узды. Кукмара районы укытучыларының волейбол буенча җыелма командасына тиңнәр булмады. Алар, барлык көндәшләрен дә җиңеп, республика чемпионнары булдылар, Кубок, медальләр белән бүләкләнделәр.

“Гаилә һәм мәктәп” журналы оештырган электр һәм аны куллануга багышланган “Без кабызган утлар” республика бәйгесендә Кукмара 4нче мәктәбенең 7 “А” сыйныф укучысы Айгөл Шәймарданова икенче дәрәҗә диплом һәм кыйммәтле бүләк – планшет белән бүләкләнде. Җитәкчесе - Раушания Вәлиуллина.

Вятка Аланының күппрофильле лицеенда төбәкара чит телләрнең музыкаль-поэтик фестивале узды. Әлеге чарада кукмаралылар да актив катнашты.

“Олимп” боз сараенда спорт ветераны Рафис Бариев призларына ветераннар арасында хоккей турниры булды.

Район Башлыгы Раул Рәхмәтуллин Өлге авылында яшәүче сугыш ветераны Хәтимә Баһаманованы 90 яшьлек юбилее белән котлады, аңа Россия Президенты Владимир Путинның котлау открыткасын, үзенең Рәхмәт хатын, истәлек бүләге тапшырды. Шулай ук юбилярны тәбрикләргә район ветераннар советы рәисе Мияссәр Мансуров, Манзарас авыл җирлеге башлыгы Рашидә Гаянова, “Кукмара” агрофирмасының генераль директоры Ришат Хәнәфиев һәм социаль яклау бүлеге хезмәткәре Регина Мусина да килгән иде. Алар да Хәтимә апага үзләренең тәбрикләү сүзләрен җиткерделәр.

Иске-Юмья авылында “Масленица” – Кышны озату бәйрәме узды. Әлеге уңайдан авыл китапханәсендә дә бу борынгы бәйрәмне билгеләп үттеләр.

Кукмара муниципаль районыннан бер төркем кунаклар мәдәният Идарәсе начальнигы Гөлнара Гареева җитәкчелегендә, Казан шәһәренең Идел буе физик культура, спорт һәм туризм академиясендә, 8 Март Халыкара хатын-кызлар көненә багышланган тантаналы чарада катнаштылар.

4 март көнне капиталь ремонттан соң Кукмара районы ветеринария оешмасы ачылды.

Янил авылында яңа төзелгән ветеринария участок пункты куллануга тапшырылды.

Районыбызга Свердловск өлкәсенең Ачит, Красноуфимск һәм Түбән Серга районнарыннан бер төркем җитәкчеләр һәм белгечләр эшлекле визит белән килгәннәр иде.