ЯҢАЛЫКЛАР
Укучыларның көзге каникуллары гөрләп дәвам итә. Егет-кызларыбызның күбесе ялларны файдалы, мавыктыргыч итеп уздырырга тырыша. Арада төрле конкурс-бәйгеләрдә катнашып җиңү яулаучылар да бар. Әйтик, районыбызның Вахит авылында яшәүче, Янил урта мәктәбенең 11 сыйныфында белем алучы Нияз Кәримуллин “Барс Медиа” компаниясенең “Татар радиосы” үткәргән бәйгедә катнашып, 14 ноябрьдә башкаланың Эрмитаж клубында узачак “Татарча HALLOWEEN”га ике кешелек билет, “Татар радиосы”ның логотибы төшерелгән мендәр һәм Казандагы “Империя танца” студиясендә биюләргә өйрәнү өчен 1400 сумлык сертификат отты. Ниязны чын күңелебездән котлыйбыз!
Авыл мәдәният йортларында театр яратучылар өчен түгәрәкләр уңышлы эшләп килә. 2 ноябрь көнне Мәмәшир авылы мәдәният йорты театр коллективы көче белән әзерләнгән Г. Камалның “Беренче театр” пьесасы буенча спектакль сәхнәгә куелды.
Починок Сутер авылы клубында “Көзге бал” кичәсе оештырылды. Бәйрәм программасында театрлаштырылган тамаша, уеннар һәм дискотека каралган иде.
5 ноябрь көнне Олыяз авылында төзелеп килүче 190 укучыга исәпләнгән, 40 урынга балалар бакчасы булган гомуми белем бирү мәктәбендә чираттагы техник киңәшмә үтте. Анда Район Башлыгы Рауил Рахматуллин, подряд оешмасы һәм төп инвестицион-төзелеш идарәсе вәкилләре катнашты. Киңәшмә барышында мәктәп территориясен төзекләндерү, җиһаз белән тәэмин итү һәм башка мөһим мәсьәләләр каралды. Эшләгән эшләргә нәтиҗә ясалды, бурычлар куелды.
Иҗади үсеш һәм гуманитар белем бирү Үзәге сәләтле укучылар өчен “Фәнгә омтыл” дигән өченче республикакүләм фестиваль игълан итә. Ул үз эченә “Экологик осталык”, “Иң яхшы видеоролик”, “Идеяләр ярминкәсе”, “Минем ачышым” дигән конкурсларны ала. Конкурсларга нәтиҗә 21 мартта Манзарас урта мәктәбендә ясалачак.
5 ноябрь көнне Кукмара А.М. Булатов исемендәге күппрофильле лицеенда 9-11 класс укучылары арасында интеллектуаль чемпионат үтте. Аны оештыручылар иҗади үсеш һәм гуманитар белем бирү Үзәге хезмәткәрләре. Чемпионатта районның барлык урта гомуми белем бирү мәктәпләреннән 150 бала катнашты. Укучылар 100 минут дәвамында 100 сорауга җавап яздылар. Нәтиҗәләр буенча һәр класстан “Иң интеллектуаль укучы” билгеләнә. Чемпионатның нәтиҗәләрен алдагы көннәрдә хәбәр итәрбез.