ЯҢАЛЫКЛАР

Казанның “Ак Барс” Яшьләр үзәгендә “Фемида – иҗади дуслыкта” иҗади сәнгать фестиваленең финал өлеше узды. Әлеге чарада бәйгенең зона турында җиңү яулаган районыбызның суд хезмәткәрләре дә катнашты. Кукмара буенча икенче номерлы суд участогының җәмәгать судьясы Заһид Сафин үзе иҗат иткән “Меңнән бер эш” дигән шигыре белән чыгыш ясады һәм “Үзенчәлекле жанр” номинациясендә өченче урынны алды.

Көшкетбаш авылында туып-үсеп, бүгенге көндә Кукмара бистәсендә яшәүче Анна Матвеевага 90 яшь тулды. Юбилярны район җитәкчесе Сергей Димитриев, район башлыгы урынбасары Равия Каримуллина, социаль яклау бүлеге җитәкчесе Светлана Җамалиева, территориаль иҗтимагый үзидарә советы рәисе Зөмәрә Җиһаншина котлады. Туган көн иясенә Россия Президентының котлау открыткасы, район җитәкчесенең Рәхмәт хаты һәм истәлек бүләге тапшырылды.

12-13 декабрьдә Слободской шәһәрендә тренер М.М. Зайцев истәлегенә дзюдо буенча Киров өлкәсе Беренчелеге үтте. “Зилант” спорт мәктәбенең самбо бүлеге укучылары уңышлы чыгыш ясадылар. Хузин Илназ 2 урын, Платонов Антон һәм Минесламов Алмаз 3 урынга лаек булдылар. Яшь спортсменнарга тазалык, уңышлар телибез.

16 декабрь көнне Башкарма комитетның ЗАГС бүлегендә Кукмара районында 2014 елда туган 400 бала теркәлде. Ул Гумеров Мөслим Танзилевич. Мөслим – гаиләдә икенче бала, Танзил Гаптелвахитович һәм Эльвира Гиниятулловна Гумаровларның көтелгән уллары. Мөслим исеме “Ислам кабул иткән” дигәнне аңлата. Әлеге балага һәм аның әти-әнисенә сәламәтлек, бәхет телик!

13 декабрь көнне Зур Сәрдек мәдәният йортында Бөек Жиңүнең 70нче еллыгына багышланган «Җитмешенче Җиңү язы килә!» дигән кичә булды. Ул “Җиңү салюты” дип аталган район фестивале кысаларында узды.

12 декабрь көнне Сәрдекбаш авылы мәдәният йортында Бөек Җиңүнең 70 еллыгына багышланган кичә үтте. Ул “Җиңү Салюты” дип аталган фестиваль кысаларында оештырылды. Сәрдекбаш авыл җирлегендә 3 сугыш ветераны һәм бер ветеранның тол хатыны яши. Кичәгә алар да чакырылган иде. Сәхнәдә үзэшчән сәнгать артистлары чыгыш ясады.

“Тукай” агрофирмасының “Гигант” бүлекчәсе базасында район семинар-киңәшмәсе булып үтте. Күмәк хуҗалык җитәкчеләре, белгечләр, авыл җирлеге башлыклары Югары Шөн фермасында терлекләрне кышлату чоры барышы белән таныштылар. Сүз үрчем алу, яшь малларны үстерү технологиясе турында барды.

14 декабрь көнне “Олимп” боз сараенда Бөтенрусия хоккей яратучылар фестиваленең сайлап алу ярышлары үтте. Дивизион “Любитель 18+” дип аталган 2014-2015 елгы сезонда Кукмар – Баулы командалары катнашты. Исәп: 4:1.

12-14 декабрь көннәрендә “Олимп” Боз сараенда 2006 елгы малайлар арасында Геройлар көненә багышланган, Кукмара районы Беренчелеге узды. Ярышларда “Спартак” (Чебаксар), “Октан” (Пермь), “Союз” (Киров), “Ягуар” (Кукмара), “Питрәчлеләр” (Питирәч), “Нефтьче-2” (Әлмәт) хоккей командалары көч сынашты. Уен нәтиҗәләре буенча 1 урынга “Ягуар”, 2 урынга “Спартак”, 3 урынга “Питрәчлеләр” командасы лаек булды.

Наркоманияне кисәтү айлыгы һәм СПИД белән Халыкара көрәш көне уңаеннан район Мәдәният йортында укучы яшьләрнең “Балкып яшә” дигән иҗат фестиваль үткәрелде. Фестивальдә Кукмара беренче гимназиясе, күппрофильле лицей, 3нче, 4нче урта мәктәпләреннән командалар катнашты. Һәр коллектив ярты сәгатьлек программа белән чыгыш ясады.