ЯҢАЛЫКЛАР

Манзарас урта мәктәбендә яшь юл хәрәкәте инспекторлары катнашында “Имин тәгәрмәч – 2014” бәйгесе үтте. Балалар катнашында килеп чыккан бәхетсезлек очракларын кисәтү максатында оештырылган әлеге чарага район мәктәпләреннән 21 команда килгән иде.

Байлангар мәдәният йортында эшләүче драма түгәрәге коллективы Данил Салиховның “Язмыш” драмасын сәхнәләштереп тамашачыларга тәкъдим итте. Әсәрдә сүз Әфган сугышыннан яраланып кайкан Нәсимнең язмышы турында бара. Әлеге рольне авылның мәдәни тормышында актив катнашучы, 2010 елда “Кукмара кышы” татар җыры фестиваленең Гран-при иясе Алмаз Харисов күңелләргә үтеп керерлек итеп башкарды.

27 апрель көнне Габдулла тукай исемендәге Әтнә дәүләт драма театрында театр коллективларының “Идел Йорт” XIV Регионара фестиваль – конкурсының сайлап алу туры узды. Әлеге конкурста Кукмара мәдәният йорты халык театры Туфан Миңнуллинның “Бәйләнчек” пьесасы буенча спектаклен тәкъдим иттеләр. Җюри кукмаралыларның чыгышларын югары бәяләде. Фестиваль нәтиҗәләре буенча Казан шәһәрендә халык театр атналыгы узачак

25-26 апрельдә Федерация Кубогына милли татар-башкорт көрәше буенча ярыш булды. Федерация Кубогына чираттагы ярышлар быел Чистайда оештырылды. 1995-1996 елларда туган егетләр арасында үткән бәйгедә 39 командадан 312 көрәшче бил алышты.

24-27 апрель көннәрендә Зәй шәһәрендә 2006 елда туган балалар арасында Татарстан Республикасы хоккей Федерациясе призына шайбалы хоккей буенча турнир узды. Барлагы 9 команда катнашты. Кукмара командасы “Ягуар” икенче урын алды.

Кукмара районында Киокусинкай каратэ буенча Татарстан Республикасы Беренчелеге узды. Кукмара данын “Ялкын” яшүсмерләр клубына йөрүче Починок Кучук, Манзарас, Туембаш мәктәбе, Кукмара куппрофильле лицее, Зур Сәрдек гимназиясе укучылары яклады. Алар уңышлы чыгыш ясадылар һәм призлы урыннар алдылар.

Кукмара балалар сәнгать мәктәбенең Венера Гыйләҗева җитәкчелегендәге “Выше радуги” җыр-бию ансамбле “Созвездие-Йолдызлык” республика фестиваленең Пирамидада узган Гала-концертында чыгыш ясап кайтты. Сайлап алу нәтиҗәләре буенча әлеге ансамбль беренче урынны алды.

Кукмара бистәсендә яшәүче Бөек Ватан сугышы ветераны Василий Антипов бүген үзенең 90 яшьлек олуг юбилеен билгеләп үтте. Юбилярны котларга Россия Эчке эшләр министрлыгының Кукмара районы буенча бүлеге начальнигы Зөфәр Гарәфиев, эчке эшләр бүлегенең ветераннар советы рәисе Ринат Миниятуллин, полициянең хезмәткәрләр белән эшләү бүлеге җитәкчесе вазыйфасын башкаручы Валерий Федоров, поселок башкарма комитеты, социаль яклау бүлеге хезмәткәрләре килгән иде.

21-25 апрель көннәрендә Язгы шәфкатьлелек атнасы кысаларында “Тылсым” халыкка социаль хезмәт күрсәтү үзәге педагоглары А.В. Петрова, М.Р. Ахмадеева, психолог Р.К. Хасанова тарафыннан Кукмара поселогы мәктәпләрендә “Яхшылык эшләргә ашык”, “Толнрантлык планетасы”, “Толерант бул” дип аталган дәресләр үткәрелде.

25 апрель көнне “Тылсым” халыкка социаль ярдәм күрсәтү үзәгендә Чернобль АЭСдә булган фаҗига нәтиҗәләрен юк итүдә катнашучылар көненә багышланган очрашу үтте. Әлеге чарага район Башкарма комитетыннан вәкилләр, социаль яклау үзәге начальнигы чакырылган иде.