ЯҢАЛЫКЛАР

Югары Арбаш урта мәктәбенә авылның күренекле шәхесе, биология фәннәре кандидаты, профессор, авыл хуҗалыгы фәннәре докторы, Югары мәктәпнең Халыкара фәннәр академиясе академигы, Россия һәм ТАССРның атказанган урманчысы, фән һәм техника өлкәсендә ТР Дәүләт премиясе лауреаты Газизуллин Әхмәдулла Һади улы исеме бирелде.

Әхмәдулла абый Түбән Арбаш авылында урманчы гаиләсендә дөньяга килә. Җиденче сыйныфны тәмамлагач, Стәрлетамак урман мастерлары курсында укый һәм 1945 елда Саба урман хуҗалыгының Мишәбаш урманчылыгына эшкә урнаша. Лубян урман техникумында укып, кулына диплом алган егетне Алтай өлкәсенә җибәрәләр. Анда якташыбыз урманчы ярдәмчесе буларак хезмәт куя, бераздан туган якларына кайтып, Йошкар-Ола шәһәрендәге урман-техник институтына укырга керә. Яшь белгечне Лубян урман хуҗалыгы техникумына укытучы итеп билгелиләр. Бер ел мөгаллимлек иткәннән соң, Әхмәдулла Һади улы Биләр урман хуҗалыгына урманчы булып урнаша, алга таба Кама урман хуҗалыгының баш урманчысы дәрәҗәсенә күтәрелә.

25 ноябрьдә Вятка Аланы шәһәре мэры Кубогына II традицион төбәкара балалар шахмат фестивале узды. Ярышларда Киров, Уржум, Вятка Аланы, Советск, Малмыж шәһәрләреннән, Тәкәнеш, Балтачтан һәм Кукмара А.М.Булатов исемендәге күппрофильле лицейдан (тренеры - В.Абдулов) барлыгы - 10 команда катнашты. Кукмаралылар Айнур Җиһаншин, Радик Ямалиев, Ирек Галиев, Илфар Садретдинов, Диана Гарафетдинова составында чыгыш ясадылар. Турнир һәр команда бер-берсе белән уйнап, әйләнеш системасында барды һәм беренче турда ук безнекеләр бик көчле Киров шәһәре командасын отты. Башка командаларга бернинди мөмкинлек калдырмыйча кукмаралылар Кубок иясе булдылар. Шәхси беренчелектә Ирек Галиев - алтын, Илфар Садретдинов - көмеш, Айнур Җиһаншин - бронза яуладылар.

Команданы, тренерны һәм командага  уңай шартлар тудырган А.М.Булатов исемендәге күппрофильле лицей директоры Любовь Степановна Камаловага зур рәхмәтебезне белдерәбез.