ЯҢАЛЫКЛАР

6 декабрьдә 14.00 сәгатьтә Олыяз авылы мәдәният йортында шагыйрь прозаик, драматург, җурналист Габдулла Тукай исемендәге Дәүләт бүләге лауреаты Ф. Яруллинны искә алу хөрмәтеннән “Шагырьләре, җырчылары булган теле бетәмени халыкның”! дип исемләнгән әдәби- музыкаль кичә үтәчәк. Әдипнең тормыш юлы һәм иҗаты белән кызыксынучы барлык райондашларны авылдашларны әлеге кичәдә көтеп калабыз.

Кукмара якташлар җәмгыяте кукмаралыларны һәм читтә яшәүче якташларны 16 декабрьдә 13.00 сәгатьтә "АК БАРС", Казан мәдәни яшьләр үзәгендә (МКЦ) булачак очрашуга чакыра. Керү ирекле. Килегез, очрашыйк, аралашыйк!

5 декабрь көнне Мәмәшир авылы китапханәчесе инвалидлар ункөнлеге уңаеннан «Язмышларга үч итеп» дип исемләнгән кичәдә катнашты. Кичә җирлек башлыгы И. Г. Ахметзяновның ветераннар советы председателе В. М. Нигматуллиның җылы котлау сүзләре белән башланып китте.  Чара балалар белән өлкәннәргә, сәламәтлекләре чикле булганнарга карата һәрвакыт игътибарлы, мәрхәмәтле, шәфкатьле, ярдәмчел булырга кирәклеген аңлату максатыннан үткәрелде. Китапханәчебез исә, көчле рухлы шәхесләр-язучылар Ф. Яруллин, Р. Шәрипов, Г. Сәгыйтовның иҗатларын чагылдырган китап күргәзмәсе белән таныштырып, әсәрләрен кычкырып укыды.Әлеге бәйрәм чарасыннан һәркем кәнагать калды.

Ел саен 1 декабрь көнне СПИД ка каршы Бөтендөнья көрәш көне билгеләп үтелә. Ул планета төбәкләре буенча таралуын дәвам итүче ВИЧ-инфекциягә каршы көрәшне ныгытуга хезмәт итә. Шул уңайдан Мәмәшир  авылы  китапханәчесе авыл яшьләре өчен"« ВИЧ инфекциясе турында без нәрсә беләбез? » дип исемләнгән әңгәмә үткәрде.” Не будь зависим”, “Молодежь и здоровье”җурналларыннан төзелгән күргәзмә аша күзәтү ясады.

Календарьдагы күпсанлы бәйрәмнәр, тантаналы даталар арасында аерым әһәмияткә ия көн бар, ул – декабрь аенда билгеләп үтелүче Халыкара инвалидлар көне. Тумыштан гарип булып, дөньяның рәхәтен күрми үскән балалар, һәлакәткә дучар булып, яшьнәп яшәр чакта урын өстенә, инвалид коляскасына беркетелгәннәр, төрле авырулар сәбәпле, сәламәтлекләре һәм хәрәкәт мөмкинлекләре чикләнгәннәрнең проблемаларына йөз белән борылу, җәмгыятьнең әлеге катламына киңҗәмәгатьчелекнең игътибарын җәлеп итүне күздә тота әлеге дата. 1990 елдан башлап, БМО Генераль Ассамблеясе карары белән ел саен 3 декабрьдә билгеләп үтелүче әлеге датаны, бер көн белән генә чикләмичә, ункөнлек итеп үткәрү традициягә әйләнде.

Әнә шуларны истә тотып Зур Сәрдек авыл җирлегенә караган инвалидлар оешмасы һәм мәдәният хезмәткәрләре мөмкинлекләре чикләнгән авылдашлар өчен “Игелек кылып яшик” исемле бәйрәм кичәсе оештырды. "Сәламәтлекләре яки мөмкинлекләре чикләнгән кешеләрнең үзләрен җәмгыятьтә шәхес итеп тоюлары мөһим роль уйный. Инвалид үзенең проблемалары белән бергә-бер калырга тиеш түгел, аны актив тормышка тарту өчен бөтен мөмкинлекләрне эшкә җигәргә кирәк”, - дип сөйләде районыбызның инвалидлар советы рәисе Р.А Нигмәтҗанов үзенең чыгышында.Әлеге чара барышында район ветераннар советы рәисе М.М.Мансуров, авыл җирлеге башлыгы Ф.М.Фәттахов, җирлекнең инвалидлар оешмасы рәисе З.В.Газизов һәм җирлек ветераннар советы рәисе Ш.Б.Закиров чыгыш ясадылар, инвалидларны кызыксындырган сорауларга җаваплар бирделәр. Әлеге чыгышлар матур концерт номерлары белән үрелеп барды. Тамашачылар “Сердәш” фольклор төркеменең җырлавына кушылып җырлап утырдылар, нәфис сүз остасы Фәттахова Н.В. сөйләгәндә тын да алмыйча шигърият дөньясына сәхәт иттеләр. Җырчыларыбыз Хәбибуллина Фәния, Сөләйманов Ренатның чыгышларын да тамашачы бик җылы кабул итте. Концерттан соң һәр катнашучы җирле спонсорларыбыз әзерләгән бүләкләрдән оттырышсыз лотерея уеннарында катнашып күңел ачты. Шунда ук шахмат-шашка турниры да оештырылды, анда җиңүчеләр шулай ук матур призларга лаек булды. Шул ук көнне мөмкинлекләре чикләнгән авылдашларга күчтәнәч итеп агрофирма “Игенче плюс” һәм шәхси эшмәкәр Хәмәтдинов Фәнис ярдәме белән тутырылган азык-төлек пакетлары өләшенде.Әнә шулай күмәк көч белән шаулап-гөрләп чираттагы матур чара үтте Зур Сәрдектә.

Язмыш тарафыннан кыерсытылганнарның җан сыкрануын сәламәт кеше ишетеп, аңлап җиткерми дә кебек. Тик ишетергә, аңларга тырышырга кирәк. Аларга ярдәм кулын сузарга беркайчан да соң түгел. Кыйммәтле даруларга, катлаулы дәвалану чараларына һәм, иң мөһиме, безнең җылы карашка, таянычыбызга мохтаҗ кешеләр барлыгын онытмасак иде. Янәшәбездәге болай да үзләрен кимсетелгән итеп тойган дусларыбызга игътибарлырак булыйк, хәлләрен аңларга, күңел авазларын ишетергә тырышыйк, авыр тормышларына – терәк, сырхауларына – шифа, кайгы-хәсрәтләрендә юаныч булыйк. Бу көннәрдә генә түгел, аларга даими рәвештә көндәлек  игътибар күрсәтеп игелек кылып яшик.

4 декабрь көнне Зур Кукмара авылы китапханәчесе мәдәният йортында булып узган  Мөхәммәд Пәйгамбернең туган көненә багышлап уздырылган  очрашу кичәсендә  катнашты. Очрашуда дин әһелләре үзләренең мөнәҗәтләрен, вәгазьләрен халыкка җиткерделәр. Шулай ук Арчадан килгән дин әһелләренең чыгышларын халык бик җылы кабул итте. Әлеге чарада 150 кеше катнашты.

1 декабрь- бөтендөнья СПИДка каршы көрәш көне булып узды. Шушы унайдан Югары –Өскебаш авылы китапханәчесе яшьүсмер егетләр белән“СПИДтан ничек сакланырга” дип исемлэнгэн әңгәмә үткәрде.Әлеге чарада китапханәчебез укучыларга ВИЧ инфекциясе СПИД авыруларын булдырмый калдыру,  аның каян килеп чыгуы, нинди юллар белән күчүе турында аңлатма бирде. Барлык укучылар да игътибар белэн тынладылар.

Зур Кукмара авылы китапханәчесе Бөтендөнья СПИДка каршы көрәш көне уңаеннан ,башлангыч класс укучылары белән “СПИД- гасыр бәласе” дигән темага  тәрбия сәгате үткәрде. Укучыларга СПИД сүзенең мәгънәсе аңлатылды. Бүгенге көндә наркомания, токсикомания, СПИД кебек афәтләрнең ничек  куркыныч булуы турындагы статистик мәгълүматлар белән таныштырды.  Кешегә иярмичә үз җавабыңны төгәл  әйтә белергә кирәклеге хакында әйтелде.

25 ноябрь көнне Мәчкәрә авылы клубында Әниләр көненә карата балалар көче белән әзерләнгән "Изге күңелле әниләр" дип исемләнгән концерт булды. 

Үрәсбаш авылы китапханәче “Тукта, ВИЧ / СПИД Бөтенроссия акциясе кысаларында  авыл яшьләре белән   әңгәмә уздырды. Әлеге чара китап күргәзмәләрендә җурнал битләрендә нигезләнеп  язылган ВИЧ- инфекция һәм СПИД  авыруларын чагылдырган сорауларга җавап табудан башланып китте. Китапханәчебез Дмитриева Л.Е бу куркыныч чирнең килеп чыгышын һәм аны булдырмый калуның төрле юлларын аңлатты. Әңгәмә яшьләргә презентация  күрсәтү белән тәмамланды.