ЯҢАЛЫКЛАР

8 май көнне Нырья авыл җирлегендә Бөек Җиңүнең 70 еллыгына багышланган митинг үтте.

Нормабашта җиләк-җимеш бакчасы ачылды.

Югары Арбаш авылында тантаналы вакыйга - Бөек Ватан сугышында һәлак булган авылдашларыбыз истәлегенә һәйкәл ачылды. Әлеге чарада мөхтәрәм кунаклар, район вәкиле Габделхай Шәймарданов, җирлек башлыгы Илгиз Ярмөхәмәтов, хәрби-табиб Рәшит Җәләлиев, Фәния Җәләлиева,сугыш һәм тыл ветераннары , авыл халкы , укытучылар ,укучылар катнашты. Тантаналы өлештән соң, хәрби –кыр ашханәсе оештырылды, һәркем тәмле ботка белән сыйланды.

Җиңүнең 70 еллыгын каршылаган көннәрдә Түбән Үрәс авыл җирлегендә истәлекле, тарихка уелып кала торган вакыйга булды: Түбән Үрәс урта мәктәбенә Советлар Союзы герое Петр Воробьев исеме бирелеп, мемориаль такта куелды. Чарада геройның килене Лидия һәм улы Анатолий Воробьевлар да катнашты.

Бүген районыбызның Җиңү паркы каршындагы мәйданда Бөек Җиңүнең 70 еллыгын билгеләп үттек. Сугыш һәм хезмәт ветераннарын, барлык кукмаралыларны район җитәкчесе Сергей Димитриев, Татарстан Республикасы Дәүләт Советы рәисе урынбасары Римма Ратникова, район хәрби комиссары Равил Гафиевлар тәбрикләде.

13 майда Татарстанда хәрби хезмәткә чакырылучыларга хокукый ярдәм күрсәтү максатында “Кайнар линия” эшләячәк. Татарстанның Кеше хокуклары буенча вәкаләтле вәкиле һәм хәрби комиссариат хезмәткәрләре шалтыратучыларның сорауларына тәфсилле җаваплар бирәчәкләр, бәхәсле мәсьәләләрне чишкәндә булышлык күрсәтәчәкләр.

Бөек Җиңүнең 70 еллыгы уңаеннан җиңел атлетика буенча район беренчелеге узды. Ярышларда 11 команда катнашты. Беренче урынны – күппрофильле лицейның беренче командасы, икенче урынны - Кукмара 4нче мәктәбенең беренче командасы, өченче урынны Ош.Юмья мәктәбе алды. Җиңүчеләргә Кубок һәм Мактау грамоталары, акчалата бүләкләр тапшырылды.

-Хөрмәт һәм олы ихтирамга лаек булган ветераннарыбыз, көнне-төнгә ялгап тылда хезмәт куйган, үсмер килеш тормыш арбасына җигелергә мәҗбүр булган өлкәннәребез, әби-бабаларыбыз! Сезне ихлас күңелдән барлык буын вәкилләрен дә берләштерүче зур бәйрәм - Җиңү көне белән тәбриклим, - диелә котлауда. - Миллионлаган кешеләрнең гомере һәм сәламәтлеге бәрабәренә яуланган көн бит ул – 9 Май. 1418 көн һәм төн дәвамында барган сугыш юлының һәр метры солдат каны белән сугарылган. Илебез азатлыгы өчен яу кырында башын салучылар арасында 11 меңнән артык райондашыбыз да бар. Сугыштан соң тән һәм җан яраларыннан газапланып, авыр хезмәттән вакытсыз гүргә керүчеләр дә бик күп!

Бүгенге көндә арабызда булган ветераннар, тыл хезмәтчәннәре алдында башыбызны иябез. Көрәш кырындагы аяусыз батырлыгыгыз, фидакарь хезмәтегез һәм безгә бүләк иткән тыныч күк йөзе өчен Сезгә зур рәхмәт. Үзегезгә һәм якыннарыгызга сәламәтлек, бәхет, тынычлык һәм уңышлар телим!

Бөек Җиңүнең 70 еллыгын билгеләп үткән көннәрдә районыбызның Олыяз авылында мөһим вакыйга – һәйкәл ачу тантанасы узды. Әлеге чарада район җитәкчесе Сергей Димитриев, “Урал” хуҗалыгы җитәкчесе Газинур Хәбибрахманов, җирлек башлыгы, чакырылган кунаклар, сугыш һәм тыл ветераннары, мәктәп укучылары катнашты. Тәбрикләү сүзләреннән соң, һәйкәл ачылды, бәйрәм җыр-биюләр белән дәвам итте.

Бөек Җиңүнең 70 еллыгы уңаеннан, “Яшел планета” экологик хәрәкәте кысаларында, Село Чура авыл җирлегендә “Лес Победы” акциясе үтте. Авылда агач һәм куаклар утырту оештырылды.