ЯҢАЛЫКЛАР

Бөек Җиңүнең 70еллыгы кысаларында, Нырты авыл җирлегендә “Җиңү Салюты” дип аталган фестиваль үтте. Анда сугыш ветераннары Сәләхов Зиннур һәм аның тормыш иптәше Мөкәрәмә апа язмышлары театраль күренеш ярдәмендә бик матур итеп сәхнәләштерелгән иде. Кичә моңлы җырлар һәм үзенчәлекле биюләр белән үрелеп барды. Бу матур кичә һәркемнең күңеленә үтеп кереп, йөрәкләрне дулкынландырды һәм бик якты тәэсирләр калдырды.

Татарстан Дәүләт Советы рәисе урынбасары Римма Ратникова, район җитәкчесе Сергей Димитриевлар, поселокта яшәүче сугыш ветераннары Касыйм Дәүләтов һәм Хөрмәтулла Хәйруллиннарның өйләрендә булып, аларның хәл-әхвәлләрен белештеләр, Бөек Җиңүнең 70 еллыгы уңаеннан әзерләнгән махсус күчтәнәчләрне һәм истәлек бүләкләре тапшырдылар.

Бүген Кукмара муниципаль район Советында Татарстан Республикасы Дәүләт Советы рәисе урынбасары Римма Ратникова гражданнар кабул итте.

Казанда тәрбиягә бала алган гаиләләрнең “Туган йорт җылысы” дигән хәйрия фестивале узды. Әлеге чарага Казаннан һәм республика районнарыннан ятимнәрне үз канаты астына алган 12 гаилә һәм аларда тәрбияләнүче 60 бала чакырылган иде. Фестивальдә районыбызның Поч.Сутер авылында яшәүче Роза һәм Владимир Шәйфетдиновлар гаиләсе дә катнашты.

27 мартка кадәр республикада наркотикларга каршы “Үлем белән кайда сату итүләрен хәбәр ит” дигән Бөтенроссия акциясе узачак. Акциянең төп максаты – наркомания һәм наркотикларның законсыз әйләнешенә кагылышлы проблемаларга халыкның игътибарын юнәлтү.

Президентыбыз Рөстәм Миңнеханов тәкъдиме буенча, 2013 елдан башлап, җирле территорияләрне үстерү проектын республика бюджетыннан софинанслау, ягъни дәүләт ярдәме күрсәтү тормышка ашырыла.

24 мартта, сәгать 9.00дә район Советы бинасында кукмаралыларны Татарстан Дәүләт Советы рәисе урынбасары Римма Ратникова кабул итәчәк.

Район Советында террорга каршы көрәш комиссиясенең чираттагы утырышы үткәрелде. Поселок һәм авыл җирлекләрендә җәмәгать җәмәгать куркынычсызлыгын тәэмин итү һәм террорлык актларын кисәтү буенча өстәмә чаралар турында район эчке эшләр бүлеге начальнигы Рамил Нургалиев, район гадәттән тыш хәлләр идарәсе хезмәткәре Эльмир Хәбибрахманов, Кукмара һәм Балтач районнарының янгын күзәтчелеге бүлеге инспекторы Нурфат Яппаровлар чыгыш ясады.

Россиянең Татарстан Республикасы буенча 10нчы районара Федераль салым хезмәте инспекциясе 27 һәм 28 мартта салым түләүчеләр – физик затлар өчен “Ачык ишекләр көне” акциясе үткәрә. Әлеге чара кысаларында теләге булган һәркемгә 2015 елгы декларация кампаниясе турында күбрәк белергә һәм физик затларның керемнәренә салым буенча декларация (3НДФЛ) тутыру турында практик киңәшләр алырга мөмкин булачак.