ЯҢАЛЫКЛАР

Аңламассың бу көнне – әле ялтырап кояш чыга, әле кап-кара болытлар хасил булып коеп яңгыр ява башлый. Бүген Кукмараның кайбер урыннарында, Зур Кукмара, Янсыбы авылларында хәтта боз да яуган.

Район ЗАГС бүлегендә тантаналы шартларда  өч бәхетле әни – Лилия Гарифуллина, Людмила Нигъмәтуллина, Венера Афанасьеваларга  “Ана  капиталы” сертификаты  тапшырылды.

Авыл хуҗалыгында иң җаваплы чор – терлек азыгы әзерләү бара. “Восток” хуҗалыгында бу эшкә ун берәмлек техника җәлеп ителгән. Илгизәр Рамазанов иярләгән “Магдон” комбайны үләннәрне чабуда эшли. Нәзир Вәлиев белән Ринат Закиров “Ягуар” һәм “Полесье” комбайннары белән кипшергән үләннәрне сенаж чокырына озаталар. Туралган массаны җиде техника ташып тора.

Өркеш авылында өр-яңадан төзекләндерелгән Яппар бабай чишмәсе янында авыл халкы җыелып бәйрәм итте. Чишмә өен Яппар бабайның оныгы, “Татавтодвор” җәмгыяте хуҗасы Васил Яппаров төзеткән. Әлеге изге эшкә авыл халкы да үз көчен керткән. Чишмә бәйрәменә ак яулыклы әбиләр дә, сабыйларын иярткән яшь әниләр дә килгән иде. Бу сөенечле чара изге догалар, Фәния абыстайның вәгазе белән башланып, җыр-моңнар, бәйгеләр белән дәвам итте. Чишмә суын кайнатып, чәй табыны әзерләнгән иде.

26 июньдә “Тылсым” социаль яклау үзәгендә, 27 июньдә “Шәфкать” тернәкләндерү үзәгендә сабантуйлар үткәрелә. Башлана 10 сәгатьтә.

27 июньдә, 11 сәгатьтә Аман-Оштырма авылында мәчет ачу тантанасы була. Барлык  дин кардәшләребезне, читтә яшәүче авылдашларыбызны тантанага көтеп калабыз.

“Нараткай” балаларны сәламәтләндерү лагере 15 июньдә үз эшчәнлеген башлап җибәргән иде. Бүгенге көндә беренче сменада барлыгы 85 бала ял итә. Алар лагерьда 2 июльгә кадәр булачаклар. Балалар төрле спорт, күңел ачу чараларында катнашалар, җырлыйлар, бииләр, рәхәтләнеп ял итәләр. “Нараткай”да әти-әниләр өчен әзерләнгән концерт та бик матур һәм күңелле, истә калырлык итеп оештырылды

Районыбыз хуҗалыкларында терлек азыгы хәзерләү бара. Авыл хуҗалыгы һәм азык-төлек идарәсеннән алынган мәгълүматларга караганда, район буенча ике мең тоннадан артык печән хәзерләнгән, 8 мең 500 тонна сенаж салынган. Яфраказык туплау өчен дә хәзер иң кулай вакыт. Бу эшкә оешма-предприятие коллективлары да җәлеп ителде. Уртак тырышлык белән 50 мең пар миллек әзерләнде, 5 тонна дару үләннәре җыелды. Узган атнада яуган яңгырлар печән әзерләүне берникадәр тоткарлады, шуңа бу атнада күпъеллык үләннәрнең беренче катын җыеп алу өчен эш темпын арттыру кирәк.

Казан шәһәренең Мирный бистәсендә халкыбызның милли бәйрәме Сабантуй узды. Әлеге чарада Кукмара районы халкыбызның көнкүреше, гореф-гадәтләре, һөнәр-кәсепләре, мәдәниятләрен чагылдырган ишегалды тәкъдим итте. Татарстан Президенты Рөстәм Миңнеханов һәм башка кунакларны район Башлыгы Рауил Рәхмәтуллин каршылады. Кунаклар күргәзмәләр белән таныштылар, үзләренә кирәкле мәгълүмат алдылар, бик канәгать булуларын белдерделәр.

Балыклы авылы китапханәсендә язучы Абдулла Алишның иҗатына багышланган кичә үтте. Анда укучылар язучының әкиятләрен сәхнәләштерделәр, шигырьләрен сөйләделәр, китап күргәзмәсе белән таныштылар. Татар теле укытучысы Алинә Гафиева Алишның тормыш юлы буенча призентация күрсәтте. Бәйрәмдә район китапханә бүлеге методистлары, авыл китапханәчеләре дә катнашты. Бу хакта китапханәче Сәлимә Каюмова хәбәр итте.