ЯҢАЛЫКЛАР

Юллар, шөкер, әйбәтләнә. Районыбыздагы "Татавтодор"ның Кукмара участогында да искитәрлек үзгәрешләр бара. Куәтле, яңа асфальт заводы август аеннан сафка басып, 30000 тонналап асфальт-битум катнашмасы чыгарды да инде. Завод территориясе зур полигонны хәтерләтә. Бу ел дәвамында 3111 тимер юл вагоны белән килгән 202206 тонна  яхшы сыйфатлы Урал тавы ташын  юл төзүдә кулланганнар.

Урта Комар халкы бу сөенечле мизгелләрне күптәннән көткән иде инде. Ничә еллар дәвамында клуб булмау авылның яшен-картын борчуга салды, бу мәсьәлә җыелышларда да күп тапкырлар күтәрелде. Бәйрәмнәр, төрле чаралар урта мәктәптә үткәрелсә дә, анда мөмкинлекләр дә, вакыт та чикле. Кичен ял итәргә мәдәни учак булмаудан аеруча яшьләр интекте. Күрше авылларга барырлар иде - Түбән Комарда да клуб юк, Югары Комардагысы иске, кечкенә. Җыелып бәйрәм итәргә, биергә урыны да булмаган авылда яшьләрнең каласы киләме соң? Ә мондый зур  төзелешне башкару өчен авыл җирлегенең дә, районның да финанс мөмкинлекләре бик чикле.

Яңа тормыш"ны без элек-электән алдынгылар сафында күреп гадәтләнгән. Арендачылар берлеге буларак эшчәнлек алып барганда ТРның атказанган агрономы, РФнең атказанган авыл хуҗалыгы хезмәткәре, Почет билгесе ордены кавалеры Рәфыйк ага Рәүфов аны республикада иң яхшы хуҗалыклар рәтенә чыгарды. Биредәге тәртип, хезмәтне оештыру, җиргә мөнәсәбәт, ирешелгән күрсәткечләр - кайсын гына алсаң да, сокланып сөйләрлек иде. Үз тирәсенә яхшы команда - белгечләр, урта буын җитәкче кадрлар, механизаторлар, терлекчеләр туплый алды, аларның сәләтен, мөмкинлекләрен күрә белде.

12 октябрьдә "Олимп" боз сарае призына хоккей буенча ачык турнир үткәрелде. 10-11 яшьлек малайлар бозда ут уйнатты ул көнне! Беренче уенда Мамадыш һәм Кукмара командалары чыккач, калку гәүдәлерәк мамадышлыларны күреп, күңелгә шөбһә йөгергән иде. Уен тигез сымак барса да (I период 2:1, II - 2:1, III - 1-2), ахыргы исәп 5:4  - безнең файдага булды. "Орион"ыбыз уенчылары җитезлек, шайбага комарланып көрәшүләре, капка артында  виражлар ясап гол кертүгә омтылышлары белән дә күңелдә уңай тәэсир калдырдылар. Кырыс таләпчән булуы белән танылган, тренерлары Илдар Ганиев хоккейчыларын уйлап уйнарга өйрәтә алган. Күз генә тимәсен!

11 нче октябрьдә балалар китапханәсендә “Татарстан башкаласы буенча сәяхәт “ үткәрелде. Чарада “Тылсым” үзәгенә йөрүче Зур Кукмара урта мәктәбе укучылары (14 кеше) катнашты, китапханәче Закирова Ә. Х. үткәрде.

Көз -  чебешләрне санар чак. Бу сүзләр төзелеш тармагына да кагыла: язгы-җәйге айларда кызу темплар белән сафка бастырылган, капиталь ремонт ясалган йортларны, социаль-көнкүреш объектларын куллануга тапшырыр вакыт җитте. Бу атнада районыбыз халкына әнә шундый күңелле мизгелләрнең шаһите булырга туры килде.

Югары уку йортларын тәмамлап, алган һөнәре буенча эш таба алмый йөргән яшьләр аз түгел. Шул ук вакытта халык хуҗалыгының һәр тармагында урта һөнәри белемгә ия булучыларга зур кытлык сизелә. Шәһәрләрдә бара торган зур төзелешләргә гади һөнәр ияләре - ташчылар, бизәүчеләр, электр, сантехника осталары, эретеп ябыштыручылар кирәк. Авыл хуҗалыгында да кадрлар җитми. Күп җирдә механизаторларның, терлекчеләрнең сафын өлкәнәя баручы буын вәкилләре тәшкил итә.
Шунысы да бар: соңгы елларда авыл хуҗалыгына заманча, компьютер белән идарә ителә торган техника кайта башлады, аларга махсус әзерлеге булмаган механизаторларны утырту мөмкин түгел. Катлаулы трактор-машиналар белән идарә итү өчен теоретик һәм практик күнекмәләргә ия булган яшьләр кирәк. Аграр уку йортларын тәмамлаган, уку барышында практика чорында осталыгын чарлаган яшь кадрлар нәкъ менә шул таләпләргә җавап бирә дә.

Авыл җирен мал-туарсыз күз алдына китерү дә кыен. Күпләр өчен алар гаиләне терлекчелек продуктлары белән тәэмин итүдән тыш, өстәмә керем алу чыганагы да булып тора. Шуңа да республикада мал санын арттыру, халыкны эш белән тәэмин итү өчен гаилә фермалары төзүгә юнәлдерелгән программа тормышка ашырыла. Аның кысаларында районыбызда да өч дистәдән артык мини-ферма булдырылды. Аларның хуҗалары сөт җитештерәләр, үгез симертәләр, сарык, куян, кош-корт асрыйлар, умартачылык белән шөгыльләнәләр.

Янсыбы авылындагы борынгы мәчет 1964 елда сүтелеп, Иске Йорт авылына клуб итеп күчереп салына. Узган гасырның 90нчы еллар башында яңа бинасы корылып, инде ул да тузгач, узган елның көзендә авылның мөхтәрәм шәхси эшмәкәре Равил Рашит улы тәкъдиме белән мәчетне таштан салу хәстәренә керешелә. Ният Ходайның "амин" дигән чагына туры килгәндер, 130 хуҗалыклы авыл кешеләре тырышлыгы, чит җирләрдә яшәүче авылдашлар булышлыгы, район Башлыгы оештырган ярдәм белән көзнең сирәк була торган  чалт аяз 30 сентябрь көнендә зәвык белән эшләнгән мәчет бинасы намаз укучыларны кабул итте.

Татарстанда "Мәрхәмәтле телефон" акциясе старт алды. Аның кысаларында ярдәмгә мохтаҗ, тышкы дөнья белән элемтәгә керү, коткару, ашыгыч ярдәм күрсәтү хезмәткәрләрен чакыру мөмкинлеге булмаган өлкәннәргә кәрәзле телефоннар таратылачак. Безнең районда социаль хезмәт күрсәтү бүлекчәсе тарафыннан 451 кешегә ярдәм күрсәтелә, шуларның 150сенең элемтә чаралары бөтенләй юк. Поселокта яшәүче - 5, авыллардагы 7 өлкән кеше шушы көннәрдә кәрәзле телефонлы булды. "Мәрхәмәтле телефон"нарны район Башкарма комитеты җитәкчесенең социаль мәсьәләләр буенча урынбасары С.Җамалиева, социаль яклау идарәсе җитәкчесе Л.Каюмова, "Тылсым" халыкка социаль хезмәт күрсәтү үзәгенең өйләргә йөреп хезмәт күрсәтү бүлекчәсе мөдире Р.Фатыйховалар тапшырды