ЯҢАЛЫКЛАР

Республикада “Җәяүле юлы” акциясе узды. Аның барышында район юл хәрәкәте иминлеге дәүләт инспекциясе хезмәткәрләре тарафыннан юл йөрү кагыйдәләрен бозган өчен – 46, җәяүлеләргә юл бирмәгән өчен 26 шофер штрафка тартылды. Шулай ук тиешле таләпләрне үтәмәгән өчен – 19, караңгыда яктылыкны кире кайтаручы элементлары булмаган 4 җәяүлегә беркетмәләр төзелде. Кагыйдәләрне санга сукмаган 17 укучыга “Тукта. Синең тормышыңа куркыныч яный” дигән кисәтү карточкалары тутырылды, дип хәбәр итте ЮХИДИ начальнигы Фирдүс Фәхретдинов.

Бәйрәмдә җирлекнең иң актив, күркәм хатын-кызлары катнашып, төрле бәйгеләрдә көч сынашты. Һәркем үзенчәлекле чәчәк бәйләмнәре, салкын ашлар, камыр ризыклары әзерләгән иде.Бәйге күңелле җырлар, шигъри тәлгәшләр, “Күбәләкләр” балалар ансамбленең чыгышлары белән үрелеп барды.

Поселок башкарма комитеты җитәкчесе Райнур Нотфуллин сүзләренә караганда, көз көне поселокта 520ләп төп агач утыртылачак икән. Әмма тирә-юнебезгә яшеллек бирүче, экологик хәлебезне яхшыртучы, һаваны чистартучы агач-куак үсентеләрен утыртмас борын ук очларын сындырып, күпме кешенең хезмәтен юкка чыгаручылар да бар арада.

Балалар бакчасына йөрүче нәни дусларыбыз китапханәгә кунакка килде. Алар яңа китаплар белән танышып узды. Кукмара белән танышу уңаеннан, “Үткән һәм бугенге Кукмара” дигән презентация күрсәтелде. Шулай ук төрле уеннар уйналды. Балаларга теннис уйнау серләре өйрәтелде. Чарада 14 бала һәм клуб хезмәткәрләре катнашты. Сәяхәтне китапханәче белән клуб мөдире оештырды.

Авыл хуҗалыгы ярминкәсе поселокның "Добреев" сәүдә йорты бинасы янындагы ярминкә мәйданчыгында оештырылды. Анда киң ассортиментта авыл хуҗалыгы продукциясе тәкъдим ителде.

КВНда “Бәрәңге”, ”VIP”, “Яшьләр”, “Помидор” командалары үзара көч сынашты. Парларыбыз бирелгән сүзтезмәләрдән шигырь язу, яшелчә белән бию, биюченең чәчен үрү, тизлекне тикшерү, кем тизрәк ашап бетерә, табышмаклар, бәхет сынау кебек конкурсларда көчләрен сынадылар.

Кукмара мәдрәсәсендә мәчетләр каршында белем бирүче мөгаллимә һәм абыстайлар катнашында киңәшмә узды. Мәдрәсә директоры Ришат Курамшин яңа уку елына булган бурычлар белән таныштырды, Гөлсинур Әхсәнова “Абыстайлар әдәбе” темасына чыгыш ясады. Катифә Низамова (Өлге), Галия Мөхәммәтовалар (Манзарас) Татарстан мөгаллимәләре форумында алган фикерләре, ә Кәркәүчтән Рузилә Гыйльфанова, Туембаштан Миләүшә Сәетовалар Хаҗ кылу хатирәләре белән уртаклаштылар. Соңыннан Рузилә абыстай Мәҗитованың вәгазе булды, дип хәбәр итте Гөлсинур Әхсәнова.