ЯҢАЛЫКЛАР

Районыбыз хуҗалыкларында һәм агрофирмаларында бөртекле сабан культураларын чәчү тәмамланды, бу эш 21905 гектарда башкарылды. Хәзерге вакытта соңгы гектарларда кукуруз һәм азык культуралары чәчелә.

“Бердәм Россия” сәяси партиясе инициативасы буенча оештырылган “Шикәр авыруына каршы бер көн” дигән чарада кукмаралылар башкала кунаклары белән очрашты, киңәшләр алды. Шикәр авыруы көннән-көн үзенең тамырларын киңрәк җәелдерә. Статистика буенча әлеге авырудан җир шарында һәр 7 секунд саен бер кеше үлә, 10 секунд саен әлеге диагноз белән балалар туа.

Республикабызда барган санитар-экологик икеайлык кысаларында тирә-юнебезне чистарту, тәртипкә китерүдән Кукмара аграр көллияте укучылары да читтә калмадылар, авылның Татарстан урамында яшәүче әбиләргә булыштылар.

Олыяз урта мәктәбенең Гомәр Хаҗиев җитәкчелегендәге “Хәтер”, Кукмара аграр көллиятенең Ринат Шакиров җитәкчелегендәге “Кар десанты” төркемнәре Новгород өлкәсенең Үлем Үзәнендә экспедициядә булып кайттылар.

Үзәк район дәваханәсендә “Мәҗбүри иминиятләү системасында иминиятләнгән гражданнарның хокукларын тормышка ашыру” темасына түгәрәк өстәл артында чираттагы очрашу үтте.

Байлангар урта мәктәбендә “Укытучы иҗадилыгы, ата-ана тырышлыгы – укучы” дигән бәйрәм-фестиваль узды. Анда укытучы, укучылар, ата-аналар һәм башка кунаклар катнашты. Кичәдә алдынгы укучылар бүләкләнде, Рифат Зарипов исемендәге күчмә кубок алдынгы сыйныфка тапшырылды.

“Созвездие – Йолдызлык” республика төбәкара яшьләр иҗтимагый оешмасы Мәскәү телеканалы белән берлектә 25-26 майда Кукмара балалар сәнгать мәктәбендә Венера Гыйләҗева, Алсу Галиуллиналар җитәкчелегендәге “Выше радуги” ансамбленең видеоклибын төшерәчәк. Районыбызда төшерелгән әлеге клип телевидение экраннары аша Кукмараны барлык Рәсәйгә танытачак.

Районда конфессияләр һәм милләтара мөнәсәбәтләрнең торышы, җәмәгатьчелек куркынычсызлыгын тәэмин итү буенча алда торган бурычлар турында район башлыгы урынбасары Равия Каримуллина, район прокуроры Минемулла Нәҗипов, Татарстан Дәүләт Советы рәисе урынбасары Римма Ратникова чыгыш ясады.

Бүген район Советының кече залында Кукмара муниципаль районында дини экстрамизмны профилактикалау һәм радикаль дини агымнарның үтеп керүен булдырмау буенча эш төркеменең утырышы булды.

Республиканың татар-башкорт милли көрәше федерациясе Кубогын быел да Кукмара районы командасы отты.Моның өчен безнекеләргә иң көчлеләрдән саналган Мамадыш, Теләче, Әлмәт командаларын җиңәргә туры килде. Аларның финалда Әлмәт командасы белән очрашып, көндәшләрен 5:0 исәбе белән җиңүләре дә күп нәрсә турында сөйли.