ЯҢАЛЫКЛАР

Минзәлә шәһәрендә өстәл теннисы буенча үткән зона ярышында Мәчкәрә коррекция мәктәбе командасы да (тренерлары Фәния Галиәхмәтова) катнашты һәм гомуми нәтиҗәләр буенча беренче урынны яулады.

Кукмара 4нче урта мәктәбендә рәсем укытучылары семинары узды.
Семинарның темасы “Заман таләпләре системасында рәсем фәнен укыту, аның үзенчәлеге һәм үткәрү методикасы” иде.

22 март көнне Олыяз урта мәктәбенең актлар залында "Сабантуй" һәм "Казан утлары" журналы делегациясе: Алмаз Хәмзин, Алмаз Гыймадиев, Алия Хәмзиналар белән очрашу булды.

19 мартта Трыш авылы китапханәчесе “Әкият иленә сәяхәт” дип исемләнгән әдәби кичә уздырды. Максаты - балаларны әкиятләр, мәкальләр, әйтемнәр, такмаклар аркылы халкыбызның иҗаты белән таныштыруны дәвам итү; балаларның сөйләм байлыгын үстерү; үзара дус, тату мөнәсәбәт булдыру.

Республикада “Игътибар – балалар!” кисәтү акциясе старт алды. Укучыларның язгы каникуллары чорына туры килүче әлеге акциянең төп максаты – балалар катнашында килеп чыккан юл фаҗигаләренең санын киметү. Акция барышында ЮХИДИ инспекторлары юл йөрү кагыйдәләрен бозучы балаларны аеруча нык контрольгә алачак. Юлны тиешсез урыннан, светофорның кызыл утына чыккан укучыларга махсус карточкалар тутырылып мәктәпләргә җибәреләчәк. Шулай ук тиешле тизлекне сакламаучы, балаларын махсус автоурындыклар белән җиһазландырмаган килеш юлга чыкканнарга да таләпләр катгый булачак.

Районыбыз укучылары язгы каникулларга чыкты. Бер атна дәвамында районның һәр мәктәбе, мәдәният, спорт, өстәмә белем бирү учреждениеләрендә төрле кызыклы һәм мавыктыргыч чаралар үтәчәк. Укучылар актив булырлар, ялларын файдалы итеп уздырырлар, дип ышанабыз.

Казанда өченче Бөтенроссия татар авыллары эшмәкәрләре җыены узды. Бөтендөнья татар конгрессы Башкарма комитеты һәм Бөтенроссия татар авыллары иҗтимагый оешмасы оештырган проектта Россиянең 33 төбәгеннән һәм Татарстаннан 400 делегат катнашты. Кунаклар һөнәрчелек товарлары һәм хәләл продукцияләр урнаштырылган күргәзмә-ярминкәдә булдылар, сукырлар өчен уку-тернәкләндерү мөселман үзәге һәм “Ярдәм” мәчете белән таныштылар, Самара өлкәсенең Гали авылына бардылар.

Районыбызның Сәрдекбаш урта мәктәбендә "Нәүрүз" бәйрәме оештырылды. Бәйрәм театральләштерелгән тамаша, җыр-биюләр, спорт уеннары белән үрелеп барды.

Советлар Союзы Герое Сабир Әхтәмовның исемен йөртүче Манзарас урта мәктәбендә “Батырлык дәресе” узды. Әлеге дәрестә район башлыгы Рауил Рәхмәтуллин, Татарстан Республикасы Дәүләт Советы рәисе урынбасары Римма Ратникова, Татарстан Дәүләт Советы депутаты Марат Зарипов катнашты һәм чыгыш ясады.

Казанда “Җиңү” Бөтенроссия уеннарының республика этабы узды. Әлеге чарада мәктәптән тыш эшләр үзәгенең өстәмә белем бирү педагогы, Чарлы урта мәктәбенең тормыш иминлеге нигезләре фәне укытучысы Александр Чапуринов җитәкчелегендәге “Витязи” хәрби-патриотик берләшмәсе дә катнашты.