ЯҢАЛЫКЛАР

3 октябрьдә Кукмараның Ленин урамындагы “Добреев” кибете һәм “Татнефтепродукт” ягулык салу станциясе арасындагы мәйданда, Халыкара өлкәннәр көненә багышлап, авыл хуҗалыгы ярминкәсе үткәрелә. Башлана сәгать 7.00дә.

Вахит мәдәният йортында Корбан гаете бәйрәмнәре, авылының үзешчән осталарының сезон ачылышы уңаеннан “Сөмбелә” бәйрәме үткәрелде. Анда мәдәният йорты хезмәткәрләре көче белән әзерләнгән күргәзмә дә тәкъдим ителде.

Татарстан Республикасы авыл хуҗалыгы һәм азык-төлек министрының терлекчелек буенча урынбасары Нәҗип Хаҗипов һәм бер төркем белгечләр көндәлек савым республика күрсәткеченнән ким булган “Кукмара”, “Тукай”, "Дружба", “Әсәнбаш”, “Лесной”, “Исток Агро” агрофирмаларында һәм “Үрәсбаш” ярдәмче хуҗалыгында булдылар.

Кукмарага Татарстан Президенты Рөстәм Миңнехановның парклар һәм скверлар буенча ярдәмчесе Наталия Фишман килде. Аның төп максаты – районыбыз паркларын хәзерге заман таләпләренә туры китереп камилләштерү, реконструкция ясау һәм проектлаштыру. Мөхтәрәм кунак район җитәкчелеге белән берлектә Кукмараның тау битендә урнашкан урман, чаңгы трассасында да булды, үзенең уңай тәэсирләр алуын билгеләп үтте.

Быелгы уңыш тулысынча амбарларга кайтты дияргә мөмкин, бары тик кукурузны гына җыеп аласы калды. Ул районыбызда 4169 гектарда игелгән иде. Аннан 79228 тонна силос салу планлаштырылса, бүгенге көнгә үтәлеш 78 тонна тәшкил итә.

Күпьеллык нәтиҗәле хезмәте, районның социаль-икътисадый һәм мәдәни үсешенә зур өлеш кертүе өчен Татарстан Республикасы Кукмара муниципаль районының Урта Комар авыл җирлеге башлыгы Исынбаев Юрий Исланович Татарстан Республикасының “Фидакарь хезмәт өчен” медале белән бүләкләнде.

2014-2015 нче уку елы нәтиҗәләре буенча оештырылган республика конкурсында районыбызның өстәмә белем бирү үзәге “Техник, экология-биология, туристлык-төбәкне өйрәнү, физкультура-спорт” номинациясендә (җитәкчесе Нуретдин Зыятдинов) 3 урынны яулады.

Кичә поселоктагы яңа стадионда кросс дистанциясенә стартлар уздырылды. Анда балалар да, яшьләр дә, өлкәннәр дә бик теләп катнашты. Алтын көз барлык спорт сөючеләргә сәламәтлекне ныгытуга омтылыш бирде.

Киндеркүл авылы янындагы тугайда районыбыз төзүчеләре үзләренең һөнәри бәйрәмнәрен билгеләп үттеләр. Әлеге чара котлаулар, матур җырлар белән үрелеп барды.

Үзәкләштерелгән китапханәнең балалар белән эшләү бүлеге хезмәткәре Нурия Гайнетдинова Кукмара 4нче мәктәбенең 6”А” сыйныф укучылары өчен “Без -экстремизмга каршы” дигән темага телдән журнал уздырды.