ЯҢАЛЫКЛАР

Узган шимбәдә район җитәкчесе, “Бердәм Россия” сәяси партиясенең җирле бүлеге сәркатибе Сергей Димитриев җитәкчелегендәге Кукмара делегациясе “Бердәм Россия – 2015” төбәк партия проекты кысаларында Яр Чаллы шәһәрендә узган зона киңәшмәсендә катнашып кайтты. Әлеге чарада “Бердәм Россия”нең төбәк бүлеге сәркатибе, Татарстан Дәүләт Советы Рәисе Фәрит Мөхәммәтшин алып барды. Сүз агымдагы елның 13 сентябрендә узачак Татарстан Президентын һәм җирле Советка сайлаулар хакында барды.

15 август көнне Өркеш авыл җирлегендә мөселман сабантуе узды. Кунаклар өчен төрле уеннар һәм ярышлар уздырылды.

“Кукморагрохимсервис” җәмгыятенең “Үрәсбаш” ярдәмче хуҗалыгында район һәм хуҗалык җитәкчеләре, җирлек башлыклары катнашында урып-җыюның барышы, туфракны көзге сукалау, көзге культураларны чәчү һәм авыл хуҗалыгында җиде айлык эш нәтиҗәләренә багышланган семинар-киңәшмә үткәрелде.

Район җитәкчелегенең халык белән очрашулары дәвам итә. Аның чираттагысы Нырья, Янил, Сәрдекбаш, Лельвиж авыл җирлекләрендә оештырылып, 2015 елның беренче яртыеллыгында башкарылган эшләргә нәтиҗә ясалды, киләчәккә планнар, бурычлар турында сөйләшенде.

Кукмараның Почтовая урамында яшәүчеләрнең җыены үткәрелде. Бу чарада сүз ишегалларында балалар мәйданчыклары булдыру, эскәмияләр, яктырткычлар кую турында барды. Чүп савытларын урнаштыру өчен махсус урыннар булырга тиешлеге дә ассызыкланды. Әлеге эшләрне башкару өчен тиешсез рәвештә урнаштырылган гараж-сарайларны сүтәргә кирәклеге әйтелде. Очрашуда №14 Көньяк бермандатлы сайлау округы буенча өченче чакырылыш Кукмара поселок советына депутатлыкка кандидат Сергей Димитриев, Район Башлыгы урынбасары Равия Каримуллина, район Башкарма комитеты җитәкчесе урынбасары Азат Гарифуллин, поселок башкарма комитеты җитәкчесе Райнур Нотфуллин һәм башкалар катнашты.

Кукмарада шахмат турниры узды. Анда, безнең районнан тыш, Арча, Байлар Сабасы, Балтач, Зәй районнарыннан һәм күрше Вятка Аланы шәһәреннән барлыгы 48 шахмат сөюче катнашты. Райондашларыбыз бу бәйгедә сынатмадылар.

Табигать саклау законнарын бозуга каршылыкның нәтиҗәлелеген күтәрү максатыннан Татарстан Экология һәм табигый байлыклар министрлыгы 2015 елның 1 августыннан закон бозу фактлары турында конкрет бозуны яки транспорт чарасын теркәп белешмә бирүче гражданнарны матди кызыксындыра башлый.

Узган атнада районыбызда бер төркем чит ил кунаклары - Латвия, Литва, Украина, Казахстан һәм Россия вәкилләрен берләштергән “Ensto” фин компаниясе делегациясе булып китте.

«Президент белән бергә» хәрәкәте кысаларында, сәламәт яшәү рәвешен пропагандалау максатында “Нараткай” лагеренда “Спортивный Татарстан” спорт мәйданчыгы оештырылды. Лагерьда ял итүче балалар спорт уеннарында катнаштылар, ГТО нормативлары тапшырдылар.

10 август көнне “Нараткай” лагеренда “Халыклар дуслыгы йорты” “Удмурт кенеш” мәдәни иҗтимагый берләшмәсе белән берлектә милли йола, гореф-гадәт һәм мәдәният көне үткәрде.