ЯҢАЛЫКЛАР

Кичә районыбызның “Лесной” күмәк хуҗалыгында уракның барышы, җирләрне көзге чәчүгә әзерләү һәм терлекчелекнең 7 айлык эш нәтиҗәләренә багышланган район семинар киңәшмәсе үтте.

“Бердәм Россия” сәяси партиясенең “Безнең кадерле ветеран” проекты кысаларында район үзәк дәваханәсендә сугыш ветераннары өчен өч палата булдырылды. Алар Илсур Шәрипов, Вадим Әхәтов, Раниф Сәлмәнов җитәкчелегендәге оешмалар көче белән ремонтланды. Ә палаталарны җиһазлауга районыбызның оешма-предприятиеләре, шәхси эшмәкәрләре зур ярдәм күрсәтте. Палаталарда ятып дәвалану өчен барлык уңайлыклар бар. Телевизор, суыткыч, микродулкынлы мич, йомшак җиһазлар куелган палаталар өй шартларын хәтерләтә. Сугыш ветераны Зиннур абый Галәветдинов та үзенең палатадан, табибларның җылы мөгаләмәсеннән бик канәгать булуын белдерде. Аның хәлен белергә Татарстан Дәүләт Советы рәисе урынбасары Римма Ратникова, район башлыгы Рауил Рәхмәтуллин, төзелеш оешмалары, район ветераннар оешмасы, предприятие җитәкчеләре килгән иде. Алар барлык палаталарда да булып, алардагы шартлар белән таныштылар.

Районда тагын бер спорт мәйданчыгы тантаналы рәвештә куллануга тапшырылды. "Бердәм Россия" сәяси партиясе программасы буенча төзелгән әлеге спорт корылмасы барлык таләпләргә дә туры китереп эшләнгән. Аны ачу бәйрәмендә  Татарстан Дәүләт Советы Рәисе урынбасары Римма Ратникова, Район Башлыгы Рауил Рәхмәтуллин катнашты.

Бүген Кукмараның Җиңү паркында "Бердәм Россия" сәяси партиясе  халык җыены уздырды. Чарада Татарстан Дәүләт Советы Рәисе урынбасары Римма Ратникова, Район Башлыгы Рауил Рәхмәтуллин катнашты. Мондый очрашуларның төп максаты - халыкның теләк-фикерләрен тыңлап, партиянең алдагы биш елда эш планына үзгәрешләр, яңалыклар кертү. Җыенда катнашучылар тәкъдимнәрен телдән дә, язмача да җиткерә алдылар. Шулай ук физкультурачылар көне уңаеннан районыбыз спортчыларына котлау сүзләре әйтелде.  Очрашуда катнашучылар чәчәк күргәзмәләре карап рухи яктан ял да итте.

“Шәфкать” тернәкләндерү үзәгендә балаларның иҗади үсешенә зур урын бирелә. Шундый юнәлешләрнең берсе - гамәли сәнгать буенча түгәрәкләр эшли. Күптән түгел тәрбиячеләр икенче коррекция төркемендә камырдан әвәләп ясау буенча дәрес үткәрделәр.

Бүген Район Башлыгы Рауил Рахматуллин Кукмара муниципаль районының участок сайлау комиссияләре рәисләре белән очрашты. Комиссия рәисләре Татарстан Республикасы Дәүләт Советына депутаталар сайлау үткәрү буенча комиссия алдында торучы төп бурычлар белән таныштылар.

Авыл җирлекләрендә халык җыеннары дәвам итә, әлеге җыеннарда районның социаль-экономик үсеше буенча 2014 елның I яртыеллыкка нәтиҗәләр ясала һәм II яртыеллыкка бурычлар куела. 5 август көнне җирле власть вәкилләре белән Лельвиж һәм Сәрдекбаш җирлеге халкы белән очрашты.

4 август көнне Березняк авыл җирлегендә районның социаль-экономик үсеше буенча 2014 елның I яртыеллыгы нәтиҗәләренә һәм II яртылыкка бурычлар турында халык җыены булды. Анда Башкарма комитет җитәкчесе урынбасары Ләйсән Мингазова катнашты һәм чыгыш ясады.

Бүген район эчке эшләр бүлегенә яңа җитәкче итеп моңа кадәр район полиция начальнигы булып эшләгән Нургалиев Рамил Ришат улы билгеләнде. Аны коллективка тәкъдим итү өчен Татарстан эчке эшләр министры урынбасары Рафаил Гыйльманов килгән иде. Ул район эчке эшләр бүлегенең эшчәнлегенә анализ ясады, кимчелекләргә тукталды, аеруча экстремизмны кисәтү, көнкүреш җинаятьчелеген киметү, халык белән тыгыз хезмәттәшлек итүне көчәйтү кирәклеген билгеләп үтте.