ЯҢАЛЫКЛАР

“Шәфкать” сәламәтләндерү үзәгендә мөмкинлекләре чикләнгән балалар өчен юл йөрү кагыйдәләренә багышланган “Җәяүлеләр мәктәбе” дип аталган чара үтте. Чарада Кукмара районының ЮХИДИ бүлеге начальнигы Фирдүс Фәхретдинов катнашты. Балалар зур кызыксыну белән төрле уеннарда, конкурсларда көч сынаштылар. Шулай ук, әлеге чарадан әти-әниләр дә читтә калмады. Чара ахырында Фирдүс Фәхретдинов балаларга юлда йөрү кагыйдәләре язылган китаплар һәм пазллар өләште.

Тырыш авылы китапханәсендә “Оста куллар “ клубының чираттагы очрашуы булды. Ул "Бәйләү – үзе бер осталык" дигән темага багышланган иде. Биредә балалар бәйләү нечкәлекләренә төшенделәр. Икенче көнне биредә үк балалар өчен "Балачак иленә сәяхәт" клубының чираттагы утырышы уздырылды.

Поселокның “Ромашка” балалар бакчасында “Карга боткасы” бәйрәме үткәрелде. Әлеге бәйрәм җырлар, шигырьләр, татар халык уеннары, кошлар турындагы белемнәрне ныгыту өчен оештырылган уеннар, спорт ярышлары белән үрелеп барды. Бәйрәм чарасында балалар белән бергәләп өлкәннәр дә күңел ачты. Бәйрәм җылы яктан очып килгән каргалар белән карга боткасы ашау белән тәмамланды.

Рудник авылында яшәүче Мансура Гайнетдинованың тәрәзә төпләрен ел әйләнәсендә чәчәкләр бизәп утыра. Язга-җәйгә чыккач, йорт алды, бакчасы, хәтта капка төпләре, коймаларның урам яклары аллы -гөлле чәчәкләргә күмелә. Йөзләп төр бакча гөле утырта ул. Мондый матурлыкка сокланмаган кеше юктыр.

Язгы каникуллар башлану белән “Кояшкай” социаль приютында, тәрбиячеләр Фазлыева Эльмира, Сафина Әлфия “Масленица” бәйрәме үткәрделәр. Рус халык әйтеме буенча, бу бәйрәмне күңелле итеп үткәрсәң, елны да шулай үткәрерсең, дигән ышану бар.

27 март көнне “Олимп” Боз сараенда 1996 елгы яшүсмерләр һәм аннан яшьрәкләр арасында “Автохан” һәм “Ак Барс Страхование” кубогына хоккей турниры узды.

Чуллы авылында «Кышны озату – язны каршылау» бәйрәме узды. Биредә Чуллы һәм Туембаш авыл халкы катнашты. Раниф Вәлиуллин ат бизәп, балаларны, Кыш бабайны, Нәүрүзбикәне утыртып, гармун уйнатып урам әйләнделәр. Кыш бабай китмәскә күпме генә тартышса да, Нәүрүзбикәгә биреште. Бу көнне күптөрле спорт уеннары, мәктәп янында хатын-кызлар һәм балалар өчен чаңгы ярышлары, мылтыктан атулар булды.

27 март көнне Нырья чаңгы трассасында П.С.Кузьмин призына команда һәм шәхси беренчелеккә биатлон буенча унынчы тапкыр ярышлар уздырылды. Ярышлар 6 төркемдә узды: 1 төркем – 1996-1998 елгыла; 2 төркем – 1999-2000 елгылар; 3 төркем – 2001 елгы һәм яшьрәкләр; 4 төркем – 19-39 яшь; 5 төркем – 40-54 яшь; 6 төркем – 55 яшь һәм өлкәнрәк.

Район мәгълүмати-методик үзәгендә “Мәгариф” милли өстенлекле проект кысаларында акчалата бүләккә дәгъва кылучы укытучыларның гавәми тыңлаулары узды. Анда район мәктәпләреннән 10 укытучы катнашты.

“Зилант” спорткомплексының йөзү бүлегендә шөгыльләнүче Илфирә Шәрипова (тренеры Эдуард Хөсәенов) Татарстан беренчелегенә үткәрелгән ярышларда уңышлы чыгыш ясап, аерым төрләрдә беренче-икенче урыннарга лаек булды. Ярыш нәтиҗәләре буенча Илфирә апрель аенда Пермь шәһәрендә булачак Россия Беренчелегенә үтте.